Spiro Iljadhi, 35 vjeç, mbeti i plagosur mëngjesin e sotëm në Sarandë, ndërsa ndaj tij u qëllua me breshëri automatike.
Iljadhi ka marrë plagë në bark, ndërsa policia në njoftimin e saj tha se ndodhet jashtë rrezikut pëër jetën. Por biznesmeni, pronar i një lokali të njohur në Sarandë, është transportuar me helikopter drejt Tiranës, për një ndihmë më të specializuar mjekësore.
Gjithashtu i plagosur fatkeqësisht mbeti dhe një kalimtar i rastit, një turist shqiptaro-amerikan, shtetasi Mario Jani, 33 vjeç. Ky i fundit ka marrë një plumb në shpinë dhe ndodhet në spitalin e Sarandës.
Ngjarja ndodhi në afërsi të një lokali, në rrugën Turizëm-Kanali Cukës në qytetin bregdetar të Sarandës.
Policia aktualisht po heton në lidhje me ngjarjen, ndërkohë është bllokuar rruga ku ndodhi ngjarja dhe po mblidhen provat materiale. Po ashtu policia po kqyr dhe kamerat e sigurisë. Nga raportimet mësohet se policia po heton në disa pista, si konfliktet që mund të ketë pasur biznesmeni, konkurenca apo edhe mbi të shkuarën e tij.
