Hungaria ishte rivali më i lehtë në letër ku Portugalia, Franca e Gjermania llogarisnin fitore ndaj tyre por ja që nuk ndodhi kështu për Francën.
Skuadra e Didier Deschamps nuk shkoi më shumë se një barazim 1-1 në “Puskas Arena” përballë 60 mijë tifozëve në një ndeshje shumë të luftuar.
Minutat e para ishin pa shumë emocione për shkak edhe të presionit të madh të stadiumit plot të mbushur dhe me kalimin e minutave Franca nis të rrezikojë ku Benzema dhe Mbappe tregohen të rrezikshëm por nuk i shfrytëzojnë rastet.
Hungaria përpiqet t’i kapë në befasi kundërshtarët ku edhe pse humbet sulmuesin kryesor Szalai për shkak dëmtimi arrin të impresionojë dhe të shënojë e para në sekondat e fundit të pjesës së parë. Fiola arrin të shkëputet në krahun e majtë dhe pasi driblon kundërshtarin arrin të shënojë dhe të bëjë që stadium të shpërthejë.
Në fraksionin e dytë menjëherë Franca hidhet në sulm për të përmbysur rezultatin me Mbappe me shokë por e kanë të vështirë pasi Hungaria luan e tërhequr. Vetëm në minutën e 66’ një veprim individual i Griezmann, një gjuajtje me të majtën pranë zones mposht portierin për të barazpeshuar ndeshjen dhe ky ishte edhe aksioni i fundit i rrezikshëm i ndeshjes, një rezultat që ndihmon paksa Francën por jo Hungarinë.
