Partia Demokratike do të zhvillojë në 17 korrik, mbledhjen e kuvendit Kombëtar, ku do të zgjidhet edhe Këshilli Kombëtar dhe më pas Këshilli zgjedh kryesinë e strukturat. I pyetur në studion e “Ditari” në A2, nëse kjo është një luftë kundër Nishanit për shkak të qëndrimit të tij kritik ndaj lidershipit të PD-së, përfaqësuesi demokrat Çlirim Gjata u shpreh se kjo do të ishte një gafë politike. Sipas tij arsyeja është ristrukturimi i PD-së me synim analizën e zgjedhjeve.
“Nishani ka qenë funksionar i PD shumë vite, deputet, ministër e president. Të ndërmarrësh të gjithë partinë në këtë tërmet demokratik të thërrasësh kongresin, kryesinë, të futësh frymë të re të bësh analizën e zgjedhjeve, nuk ka nevojë. Nishani nuk ishte kandidat.
Unë nuk isha dakord kur i quajti zgjedhjet në PD maskaradë, se vetëm maskaradë nuk kanë qenë. PD po luan me 70 mijë anëtarët e saj, posti i Nishanit është post honorifik. Por çështja është që analiza që do t’i bëhet zgjedhjeve. Të tre kandidatët pranuan rezultatin dhe askush nuk është ngritur t’i gjuajë me gurë për t’i përzënë nga partia. Do ishte gafë e madhe politike për kreun e këshillit kombëtar. Asnjë fjalë nuk është thënë për Nishanin. Do të bëhet analiza për masakrën zgjedhore të 25 prillit”.
Gjata thekson se është ngritur grupi i punës në PD për të analizuar nëse janë të nevojshme ndryshimet në statut, si edhe do të bëhet analiza për zgjedhjet e 25 prillit, ku sipas tij ka
“Është ngritur grupi i punës për të parë nëse ka ndryshime në statut. Janë gjëra shumë të mëdha të performancës në parti. Ka shumë gjëra në lidhje me masakrën elektorale të 25 prillit, ka dalë vetëm maja e ajsbergut dhe ne po punojmë të nxjerrim gjithçka për këtë masakër. Në SPAK ka shumë gjëra”.
Ai u shpreh i vendosur për mosnjohjen e zgjedhjeve dhe theksoi se pas analizës në PD beteja do të vazhdojë në të gjitha frontet dhe në shtator në parlament.
“Ne zgjedhjet nuk i njohim dhe kemi marrë betejë kundër kësaj. Është beteja e brendshme. Ne mund të hymë në parlament dhe të bëjmë betejë të jashtëzakonshme betejë në të gjitha frontet. Tani do të bëjmë analizën përkatëse aty ku ka nevojë për ndryshime në statut dhe në shtator jemi gati për fillimin e betejës”.
Gjatë fjalës së tij, Gjata ripërsëriti qëndrimin e tij për masakër elektorale dhe akuzoi PS se po sillet njësoj si Enver Hoxha. Ai tha se beteja e PD do të jetë me modelin e sofistikuar të Ramës për manipulimin e zgjedhjeve.
“Këto procese në PD po vijnë shumë shëndetshëm dhe natyrshëm. PD e meriton emrin, sepse shikoni kë kemi përballë; ku zgjedhjet për kryetar ka 15 vjet që nuk bëhen bëhet referendum për të mos bërë zgjedhje. Në PD bëhen zgjedhje me 4 kandidatura. PS është fiks si Enver hoxha, i ka dalë kryetari i bashkisë tani. Si ka mundësi që dy anonimë kanë marrë më shumë vota se vetë Rama? Fno post mortum ka marrë më shumë vota se shumë të tjerë. Jemi jashtë çdo lloj logjike politike normale. Nuk është kot, asgjë nuk ndodh rastësisht. Edhe mënyra si i hapi lista i hapi për përçarje. Dhe me këtë ia bëri vetes.
Duket që u blenë votat. Kemi pavlefshmërinë e zgjedhjeve në nivelet më të ulëta në Ballkan, kurse këtë viti ka shkuar mbi 80 mijë. Kjo është beteja jonë për të ardhmen. Ne kemi marrë 600 e ca mijë vota. Mos të harrojmë patronazhistat. Ky sistem tmerroi Evropën. Rama ka mekanizma të sofistikuar të manipulimit të zgjedhjeve, një ndërmarrje që funksionon në mënyrë të kalkuluar. Ne betejën e kemi me këtë model. Çfarë do që të bëjë KQZ me Kolegjin, zgjedhjet duhet të jenë pranim me vullnet të plotë gjithëpopullor”, tha Gjata.
