Nga BoldNews.al
Përfundimi i koncesionit të shumëdiskutuar të kolaudimit të makinave, i ka dhënë një “çek te bardhë” Blendi Gonxhes, drejtorit të Transportit Rrugor. Të ardhurat e majme nga ky shërbim po menaxhohen nga vetë Gonxhja, i cili vetëm për disa muaj ka tenderuar miliona euro për fasada dhe godina. Kaosi me kolaudimet vijon prej javësh, ku gjatë kësaj kohe kanë dalë disa udhëzime që rrëzojnë njëra-tjetrën. Megjithatë, kjo nuk e ka penguar Gonxhen që të hapë arkat e SHA-së që drejton, duke bërë tendera pafund, madje edhe për foto dhe video.
BoldNews ka siguruar dokumentet e një tenderi të shpallur nga Gonxhja, ku objekti i kontratës është “shërbime me video animacione, promo dhe shërbime fotografike”. Fondi për këtë tender është plot 5,835,000 lekë pa TVSH (Me TVSH rreth 60 mijë euro). Një fond i majmë për këto shërbime të kota. Qytetarët nuk kanë nevojë për foto dhe video, po për shërbime bazë. Të rregullohet cilësia e shërbimeve dhe më pas të shohin këto foto dhe video në rrjetë sociale apo në ndonjë reklamë në TV.
Gonxhja i partisë kërkon xhirime me kamera, që do të jenë në terren gjatë eventit nga një operator i specializuar dhe montazhi i materialeve bruto nga një specialist i fushës. “Xhirimet duhet të bëhen në rezolucionin maksimal të mundshëm, që aktualisht është 4K dhe cilësinë më të mire në treg. Video duhet të ketë karakter dokumentar e cila duhet të përmbajë brenda të gjitha informacionet nëpërmjet titrash dhe tabelash elektronike rreth eventit dhe DPSHTRR-së”, thuhet në këto dokumente. Madje, specifikon se kërkon video 1-minutëshe për përdorim në rrjete sociale. Kërkon edhe xhirime me dron, shërbim fotografik për FB apo edhe për foto në evente.
Më tej, DPSHTRR specifikon se kërkon video të shkurtra me karakter marketingu të cilat përcjellin një ide komplekse në një kohë të shkurtër, më pak se 120 sekonda. “Përdoren për të komunikuar objektivat, investimet, arritjet, risitë dhe njoftimet”, thuhet në këto dokumente. Gjithashtu, edhe lidhje live në FB dhe Instagram. “Promovimi në rrjetet sociale i referohet teknikave që synojnë rrjetet sociale dhe aplikacionet për të shpërndarë produktet apo shërbimet që ato ofrojnë”, vijon dokumenti.
