Cristiano Ronaldo dhe më pas Paul Pogba u bënë të dy protagonistë gjatë konferencës për shtypin, pak ditë më parë. Portugezi hoqi shishet e Coca Cola veprim që pati impakt të madh dhe i shkaktoi humbje të mëdha në bursë kompanisë së famshme amerikane.
Mesfushori francez e “kopjoi”, por zgjodhi të ulte poshtë tavolinës një shishe Heineken. Pogba është besimtar i rregullt mysliman, fe që nuk e lejon konsumimin e alkoolit.
Këto ngjarje e kanë acaruar UEFA-n, që ka paralajmëruar lojtarët t’i japin fund këtyre veprimeve.
“Lojtarët janë të detyruar të zbatojnë rregullat e turneut. UEFA nuk do të dënojë kurrë një lojtar drejtpërdrejtë, do e bëjmë gjithmonë nëpërmjet Federatave. Ne kemi një rregullore të nënshkruar nga pjesëmarrësit, të cilët janë Federatat.
I kemi kujtuar Federatave të përfshira që kanë detyrime dhe fitimet nga sponsorët janë rëndësishme për turneun dhe futbollin evropian“, u shpreh Martin Kallen, drejtori i Euro 2020.
Coca-Cola dhe Heineken janë dy ndër 12 sponsorët e nivelit më të lartë për Euro 2020 duke kontribuar në të ardhurat totale të turneut, që shkojnë rreth 2 miliard euro.
