Dy persona janë arrestuar nga Policia e Durrësit si të dyshuar për vrasjen e vëllezërve, Viktor e Besmir Haxhia.
Burime bëjnë me dije se personat e arrestuar janë Besian Xhixha dhe Enver Diva.
Nga raportimet mësohet se ata janë kontaktuar nga Nuredin Dumani për të kryer vrasjen. Sipas raportimeve, ato kanë parë vendin dhe kanë studiuar territorin për të kryer vrasjen e dy vëllezërve.
Mbi Xhixhën dhe Divën rëndon akuza e “Sigurim i kushteve dhe mjeteve për të kryer vrasje”.
SPAK mbylli dje hetimet për të shumëkërkuarin Talo Çela dhe grupin e tij kriminal, të cilët akuzohen për vrasjen e vëllezërve Haxhia në Durrës dhe për një sërë veprash të tjera kriminale.
Krimi, sipas SPAK, u zbardhn përmes deklarimeve të të penduarit të drejtësisë, Klevis Alla.
Alla në dosjen e SPAK thekson se ka qenë ai i cili i ka nxjerrë në prit vëllezërit Haxhia duke i marrë në telefon për t’i dhënë lekët e një borxhi. Sipas tij takimi u la te tregu i makinave, ku Talo Çela dhe Nuredin Dumani i ekzekutuan me breshëri kallashnikovi në makinën e tyre në lëvizje e sipër.
“Besmir Haxhinë e nxora unë në pritë. I telefonova dhe i thashë hajde të të jap lekët e borxhit. E lamë të shiheshim te tregu i makinave. Kur pashë makinën e tij e parakalova. Atë moment Talo Çela dhe Nuredin Dumani, qëlluan me breshëri. Sulmi zgjati 3 minuta. Ne nuk e dinim që në makinë me të ishte edhe vëllai tjetër Viktori. Për vrasjen e Dorian Shkozës, dua të them se Talon e informoja unë për lëvizjet e tij. Vrasjen e Dorianit mendoj e ka bërë Besmir Haxhia dhe Talo, nisur nga karakteristikat trupore. Shofer s’e di kush ka qenë”.
Talo Çela e Nuredin Dumani si dhe Altin Ndocit akuzohen zyrtarisht nga prokuroria për ekzekutimin e vëllezërve Haxhia dhe mbi ta rëndojnë akuzat e vrasjes në rrethana cilësuese, pjesëmarrje në grup të strukturuar kriminal, dhe armëmbajtje pa leje.
I penduari Alla në rrëfimin e tij thekson se ka qenë Nuredin Dumani, ai i cili e ka kontraktur për vrasjen e Besmir Haxhisë, duke i treguar dhe një foto të shënjestrës. Alla do të kishte rolin e shoferit dhe do të paguhej 10 mijë euro për këtë shërbim, ndërkohë që shprehet se makina e përdorur në vrasje u ble nga Dumani në zonën e Astirit.
“Kur mbërrita te tuneli në Shënavlash, aty ishte Talo Çela, Altin Ndoci e Nuredini. Talo kishte maskë me fytyrë njeriu. Nuredini kapuc si RENEA, xhup pa krahë me mbishkrimin OFL. Ata zbritën nga makina e tyre dhe morën 3 armë në bagazh. Unë shkova deri aty t’ju dërgoja makinën. Por Talo me kërcënoi: Ma ke thënë, ti do vish me se sbën dhe me ka kërcënuar. Hipa në Toyotan me targa AA 375 XN. Të tre u futën në automjet. Unë telefonova Besmir Haxhinë dhe lashë takimin”, tha Alla.
Klevis Alla Alla rrëfyer përpara prokurorëve edhe motivin e ekzekutimit të vëllezërve Haxhia, si dhe nisjen e konflikteve mes pjestarëve të grupit të Talo Çelës
“Pas ngjarjes në Rinas, filloi përçarja e grupit të Talo Çelës, Dorian Shkozës, Altin Ndocit e Besmir Haxhisë. Përçarja filloi pasi hyri në lojë lek i madh nga vjedhja e Rinasit”, përfundoi i penduari.
Kujtojmë se Talo Çela dhe Nuredin Dumani ndodhen në kërkim kombëtar madje Policia e Shtetit ka vendosur dhe një shumë të konsiderueshme për këdo që jep informacion për vendodhjen e tyre, por derimë tani asnjëri prej tyre nuk është gjetur.
Vëllezërit Haxhia u ekzekutuan më 27 pril 2020, ndërsa po udhëtonin me makinën e tyre tip Golf. Në atë kohë u raportua se ndaj automjetit ishte qëlluar me breshëri, ndërsa policia gjeti 55 gëzhoja
Besimir Haxhiaj ishte i martuar dhe ka një fëmijë. Ndërsa vëllai tjetër Viktori ishte avokat. Viktori dhe Besmiri ishte pronarë edhe të një kompanie “BVAUTO”, shërbim karotrec, në lagjen 15, rruga Aleksandër Goga, në Durres.
Dy vëllezërit kishin një servis të tregu i makinave dhe jepnin makina me qira. Gjithashtu të dy vëllezërit kishin edhe një Exchange dhe pikë transferimi parash në Durrës.
