Drejtori dhe elektricisti i OST-së në Fier janë arrestuar një ditë pas vdekjes së dy elektriçistëve të OST te nënstacioni elektrik në fshatin Jagodinë të Roskovecit. Policia njoftoi se ka rënë një shtyllë elektrike e tensionit të lartë, dhe për pasojë janë dëmtuar dy punonjës të elektrikut (OST) të cilët ishin duke punuar. Si pasojë e dëmtimeve të mara, humbën jetën.
Arrestimi
Policia e Fierit njoftoi këtë të Mërkurë arrestimin për shpërdorim detyre të:
Andi Prifti, 38 vjeç, banues në Fier, me detyrë Drejtor pranë OST, Njësia Operative Fier.
Eriseld Lala, 38 vjeç, banues në Fier, me detyrë Inxhinier pranë OST, Njësia Operative Fier.
“Arrestimi i tyre u bë pasi këta shtetas në bashkëpunim me njeri tjetrin kanë urdhëruar punonjësit e tyre të kryejnë punime në mënyrë të kundraligjshme në linjën 110 KV në Jagodinë, Fier, ku si pasojë kanë gjetur vdekjen gjatë punimeve shtetasit Gj.D., 50 vjeç dhe B. S., 64 vjeç, punonjës të Njësisë Operative Fier”, thuhet në njoftimin e bluve të Fierit.
Materialet procedurale i kaluan Prokurorisë pranë Gjykatës së Shkallës së Parë Fier, për hetime të mëtejshme, shtuan të njëjtat burime.
