Ka përfunduar pas një ore e gjysmë takimi në Bruksel mes kryeministrit të Kosovës, Albin Kurti, dhe Presidentit të Serbisë, Aleksandër Vuçiç, ku nga të dhënat e para kreu i shtetit serb ka deklaruar se është rënë dakord për vijimin e dialogut në nivel të lartë deri në fund të muajit korrik.
Takimi është zhvilluar me ndërmjetësimin e Josep Borrell, shef i diplomacisë evropiane. Më parë, Borrell ka biseduar në takime të ndara fillimisht me delegacionin e Kosovës e më pas me atë të Serbisë.
Përfaqësuesi serb në dialog, Petar Petkoviç, për mediat serbe tha në Bruksel se ata janë të shqetësuar për shkak të bashkëpunimit të ngushtë mes BE dhe SHBA, por do të vazhdojnë betejën për interesat e tyre, ndërsa nga pala e Kosovës deri tani nuk ka pasur prononcuar.
Takimi ka nisur në orën 11:00, ndërsa në orën 12:30 është paralajmëruar një konferencë për media e përfaqësuesit Special të BE-së për dialogun Prishtinë – Beograd dhe çështje tjera të Ballkanit Perëndimor, Miroslav Lajçak.
Pas takimeve të ndara, Borrell ka deklaruar se “Jam nikoqir i një takimi të ri të dialogut Beograd-Prishtinë, të nivelit të lartë Beograd-Prishtinë sot me presidentin e Serbisë, Aleksander Vuçiç dhe kryeministrin Albin Kurti. Dialogu dhe rezultati nga dialogu është rruga drejt së ardhmes evropiane të të dy palëve. Ndërkohë, (dialogu u deritanishëm) solli rezultate të rëndësishme për qytetarët e tyre”.
