Kujdestarët e një kopshti zoologjik në Tailandë pretendojnë se një luan albin ka parashikuar korrektësisht rezultatet e ndeshjeve të para të kampionatit evropian të futbollit Euro 2020.
Felini i madh i quajtur ‘Boy’, zgjodhi Anglinë para fitores së tyre ndaj Kroacisë në fundjavë, si dhe parashikoi fitoren e Holandës ndaj Ukrainës.
Sot kujdestarët e kopshtit zoologjik Khon Kaen në verilindje të vendit, publikuan pamjet që tregonin se Boy parashikonte se Franca do të mundë Gjermaninë dhe se Portugalia do të mundë Hungarinë, teksa dy skuadrat përballen këtë të Martë.
‘Boy’ bën parashikimet e tij duke zgjedhur copën e mishit të varur në çdo flamur të skuadrave, që i ofrohen atij në një tel.
Aventurat e Boy janë të ngjashme me ato të oktapodit Paul, i cili fitoi reputacionin si ‘orakull’ në evropianin e vitit 2008 dhe kupën e botës në 2010.
Për parashikimet e tij, Paul zgjidhte një nga dy kuti identike me ushqim, një për secilën skuadër.
Ashtu si në rastin e Boy, Paul besohet se “zgjidhte” skuadrën nga kutia e së cilës hante i pari.
