GJKKO vendosi sot të pezullojë çështjen ndaj Gentian Malindit me argumentin se prej 1 viti nuk dihet se ky ndodhet dhe nuk mund të gjendet. Ndërkohë vijon procesi për Ardian Begen e Altin Myslihaken.
Procesi ndaj Malindit nisi për trafik ndërkombëtar narkotikësh.
Gentian Maldini është personi i shpallur në kërkim prej më shumë se 1 vit për trafikun e 137 kg kokainë në Maminas.
Malindi me profesion jurist, është person me precedent të mëparshëm penal.
Më 8 qershor të 2013 ai është arrestuar nga policia pasi kap me 500 kg drogë të llojit kanabis sativa, por më vonë gjykata e liroi. Droga u kap nga policia në zonën e Plazhit, e fshehur në furgon tip “Benz Mercedez”, me targë AA 938 AE, e cila kishte si destiancion Italinë.
Por 42-vjeçari është i njohur në fushën e biznesit të peshkut. Ai ka në pronësinë e tij varkë e cila peshkon në detin Adriatik, që në QKR mban emrin e biznesit “Anyway”.
42-vjeçari ka një njohje të vjetër edhe me Altin Myslimhakën, të arrestuarin tjetër pasi ky i fundit punonte si punonjës në varkën e tij të peshkimit.
Ngjarja për të cilën nisi edhe procesi ndaj Malindit e ka zanafillën në shtator të 2019-ës, kur 4 konteinerë nga Ekuadori u pikasën në portin e Pireut, dhe policia greke konstatoi se gjendeshin 137 kilogramë kokainë me destinacion Portin e Durrësit.
Grekët sinjalizuan policinë shqiptare, e cila bashkë me prokurorinë hoqi drogën dhe vuri oriz dhe GPS. Pas tri ditësh në port shkuan 2 persona, Altin Myslimhaka dhe Ardian Bega, për të marrë drogën. Të dy, tashmë janë të arrestuar.
