Dinamo prezantoi ditën e sotme logon e re të klubit. Pas shumë vitesh, blutë e kryeqytetit vendosën të ndryshonin logon e tyre hisorike, por një gjë e tillë nuk është pritur mirë nga tifozët.
Përmes një postimi në faqen zyrtare, “Blue Boys” që janë tifozët fanatik të Dinamos janë shprehur kundër kësaj logo që ka ndryshuar historinë e klubit. Tifozët vazhdojnë më tej duke theksuar se ata nuk do ta përdorin këtë logo në organizimet e tyre pasi nuk i përfaqëson.
Postimi i Blue Boys:
Nisur nga ndryshimi i logos së klubit Blue Boys në emër të tifozerisë blu shprehin mospëlqimin e tyre në lidhje me logon e re. Ne nuk jemi kundër ndryshimeve por gjithmonë kur ato janë për mirë, të ndryshosh një logo historike, autentike dhe ndër më të bukurat në Europë me një D shtypi dhe 2 vijëzime paralele të pakuptimta dhe pa lidhje me historinë dhe identitetin e klubit Dinamo për ne është e papranueshme. Ideatori dhe ata që pranuan ndryshimin e logos mund ta përdorin atë si të duan por ne nuk kemi ndërmend ta përdorim, në organizimet tona ne do të vazhdojmë të përdorim logon e vjetër sepse kjo logo e re nuk na përfaqëson. Nëse dikush dëshiron të bëjë histori tek Dinamo ta bëjë me punë dhe jo me ndryshime të kota.
Dinamo e përjetshme…
Blue Boys
