Drejtuesi i Prokurorisë së Posaçme Arben Kraja raportoi këtë të Hënë para parlamentit lidhur me punën e institucionit që ai drejton për vitin 2020, si dhe ju përgjigj pyetjeve të deputetëve.
Kraja u pyet nëse do të ketë hetime nga SPAK për shtetasin shqiptar të shpallur “non grata”, ndërsa iu kujtua se për vetëm një prej tyre – Adriatik Lalla – ka nisur procedim penal.
“Lista është një proces që ndodh me SHBA, ne jemi në Shqipëri dhe kemi parashikimet tona se si niset ndjekja penale, bëhet ndjekja penale dhe shkohet para gjykatës. Për çdo shtetas, për kompetencat që kemi, do ta çojmë çdo hetim deri në fund, qoftë penal, qoftë pasuror deri në konfiskim”, tha Kraja.
