Trajneri Thomas Brdariç do të jetë trajneri i Vllaznisë edhe për sezonin tjetër. Burime pranë trajnerit bëjnë të ditur se ka rënë dakord për të vijuar që të jetë në krye të pankinës kuqeblu edhe për një sezon tjetër.
Brdariç është takuar mbrëmjen e sotme me drejtues të Vllaznisë dhe pas një bisede prej afro 90 minutash është rënë dakord që kroato-gjermani të vijojë të jetë pjesë e kuqebluve edhe për sezonin e ardhshëm.
Brdariç ka kërkuar disa detyrime ende të pashlyera që mesa duket tashmë do të shlyhen, një fushë profesionale për stërvitje që është zgjidhur dhe pritet te jetë gati si dhe është konfirmuar një merkato për pjesëmarrjen në Konferencë League të Vllaznisë.
Brdariç mësohet sipas burimeve se ka hedhur firmën dhe pritet vetëm ana formale e zyrtarizimit te tij si trajner i kuqebluve. Brdariç kishte disa oferta të mira nga disa ekipe por pas bisedave me drejtuesit e Vllaznisë ka vendosur të qëndrojë në Shkodër me një pagë mujore prej afro 7 mijë euro në muaj pa llogaritur bonuset në rast të trofeve apo pjesëmarrjes në Kupat e Europës sezonin e ardhshëm.
Brdariç si trajner i Vllaznisë arriti te shpallet nënkampion me këtë ekip si dhe fitoi Kupën e Shqipërisë gjë e cila e bëri atë një trajner të kërkuar nga disa klube. Fillimisht ishte pranë largimit, por përmirësimi i disa kushteve dhe pagës ka bërë që kroato-gjermani të vijojë aventurën në Shkodër.
