Bujar Nishani, kreu i Këshillit Kombëtar të PD, tha se pas 25 prillit, Lulzim Basha, u zhduk nga konferencat për mediat, shmangu përballjet me gazetarët dhe kjo është e turpshme.
Lidhur me një deklaratë të bërë prej tij, se Lulzim Basha ka pasur dijeni për përfshirjen e Sali Berishën në listën e zezë të DASH-it, Nishani solli në vëmendje një detaj nga mbledhja e Këshillit Kombëtar.
“Në mbledhjen e Këshillit Kombëtar, kam kërkuar zhvillimin e analizave për zgjedhjet e 25 prillit dhe mu tha se jo, se kemi ngjarje të rënda përpara.
Zoti Kadilli ka pohuar publikisht se e ka ditur ai dhe z. Basha që në muajin shkurt se emri i z. Berisha do të ishte në listën e zezë të DASH.
Po kështu, në datën 16 maj u shpall vendimi për mbajtjen e zgjedhjeve në 13 qershor, ndërkohë që në 19 maj u shpall vendimi i Sekretarit amerikan të Shtetit.
Lulzim Basha në asnjë moment nuk përgënjeshtroi zërat se z. Basha nuk e lejonte qëndrimi i Sali Berishës për tu bërë lider. Basha nuk reagoi asnjëherë lidhur me këto aludime, madje i la hapësirë”, tha Nishani.
I pyetur mbi deklaratën e Berishës se mund të kthehej në krye të PD, Nishani tha se “mendoj se është një mesazh që u jepet demokratëve se gjërat nuk janë mirë, pasi ai po thotë jam gati të bëj një sakrificë për të ringritur PD”.
“Një deklaratë e tillë duhet parë me shqetësim për gjendjen ku ndodhet PD, ndaj dhe mendoj se që nga nesër çdo anëtar i partisë duhet të angazhohet për një rithemelim të partisë”, tha Nishani.
