Zgjedhjet në PD, sot anëtarësia zgjedh kryetarin e ri/ Çfarë pritet

Mbi 75 mijë anëtarë të Partisë Demokratike votojnë sot përmes parimit një anëtar një votë për të zgjedhur Kryetarin e ri të kësaj partie.

Procesi i votimit nis në orën 08:00 dhe mbyllet në orën 19:00, ndërsa në garë janë 4 kandidatë.

Sa i përket fletës së votimit, i pari në listën e kandidatëve është renditur Fatbardh Kadilli. Pas tij e dyta është Edith Harxhi, ndjekur nga Agron Shehaj dhe në fund kryetari në detyrë Lulzim Basha.

Në të gjithë vendin janë ngritur 76 qendra votimi, bazuar në organizimin e degëve të kësaj partie, ku për çdo degë ka 1 qendër votimi.

Sipas udhëzimit, anëtarët me të drejtë vote duhet të zgjedhin vetëm 1 prej kandidatëve, pasi vota e tyre do të jetë e pavlefshme nëse votojnë për më shumë se një prej katër emrave në garë.

Lulzim Basha, i cili është kryetari në detyrë i PD, kërkon mandatin e 3-të për drejtimin e partisë më të madhe opozitare, ndërsa përballë tij janë Fatbardh Kadilli, Edith Harxhi dhe Agron Shehaj.

Basha iu bashkua PD në 2005, mbajti 3 poste ministrore nga momenti që Sali Berisha krijoi qeverinë e tij, deri në 2011 kur kandidoi për bashkinë e Tiranës. Ministritë e drejtuara nga Basha ishin ajo e Transporteve, e Jashtme dhe e Rendit, ndërsa në 2011, arriti të marrë drejtimin e Bashkisë së Tiranës duke mundur Edi Ramën me 11 vota diferencë.

Basha u vendos në krye të PD në 2013 pas një procesi zgjedhor, ku përballë kishte të ndjerin Sokol Olldashi. Gjithashtu Basha u rikonfirmua Kryetar i PD në 2017 kur kandidonte përballë Eduart Selamit, ish-kryetar i PD-së nga 1992 në 1995, kohë kur u shkarkua pas një kongresi të jashtëzakonshëm.

LEXO EDHE  Gjoba 110 milionë euro për Becchetin/ Tabaku: E barabartë me buxhetin e Bashkisë së Tiranës

Fatbardh Kadilli, i cili për disa kohë ka mbajtur mandatin e Sekretarit të Burimeve Njerëzore në PD. Kadilli gjithashtu ka qenë deputet i kësaj partie, ndërsa ditën e sotme synon postin e Kryetarit.

Edith Harxhi, ish-greviste e urisë në grevën e studentëve në 1990, ka mbajtur postin e zv.ministres së Jashtme. Harxhi ka qenë një nga kritiket e Lulzim Bashës në 8 vitet, që ai ka drejtuar PD-në, dhe në zgjedhjet e brendshme të kësaj partie, mbështetet nga “Grupi për PD”, ku përfshihen edhe Bujar Nishani dhe Arben Imami.

Agron Shehaj, iu bashkua PD në 2017, kur kandidoi për deputet në Qarkun e Vlorës si drejtues i listës, dhe në zgjedhjet e fundit parlamentare, ishte një nga drejtuesit politikë të kësaj partie në Qarkun e Tiranës, ku mbulonte njësitë nr 5 dhe 7.

Të tre kandidatët, Kadilli, Harxhi dhe Shehaj, kanë shprehur kritika të forta në drejtim të Lulzim Bashës, i cili e konsideron 25 prillin, si një masakër zgjedhore, ndërsa ka kërkuar mbështjeten e anëtarëve të partisë që drejton për një tjetër mandat. Sipas tre rivalëve të Bashës, rezultati i 25 prillit, është përgjegjësi e kreut demokrat, i cili nuk arriti të krijojë frymë dhe të bindë shqiptarët të votojnë alternativën e PD.

Kjo është hera e parë në historinë e PD që në garën për kryetar marrin pjesë 4 kandidatë, pasi në vitet e mëparshme ose ka pasur dy të tillë, ose gara ka qenë pa rivalë.