Nga Boldnews.al
Ministrja e Arsimit, Evis Kushi, tentoi nëpërmjet rrjeteve sociale që të shuajë që në gjenezë revoltën e maturantëve, të cilët ndihen të tradhëtuar prej saj personalisht, por edhe autoriteteve të tjera, pas premtimit se tezat e provimeve përfundimtare do të jenë në nivelin e dijeve të marra nga një sezon shkollor gjysmak për shkak të pandemisë covid-19.
Qindra maturantë u mblodhën për të protestuar mesditën e së Shtunës në Tiranë, Durrës, Fier, Shkodër, Gjirokastër e në qytete të tjera.
Ata kundërshtojnë nivelin e vështirë të tezës së provimit të Matematikës, për të cilin vlerësojnë se i tejkalon leksionet që kanë marrë në auditorë.
Ministrja Kushi reagoi sapo mediat po shfaqnin në seri grumbullimet masive të të rinjve.
Në rrjete sociale, ajo u shpreh se “Në këto momente, jemi duke vlerësuar edhe një herë me grupet e ekspertëve nivelin e vështirësisë së çdo pyetjeje në testin e matematikës. Dhe në rast se na rezulton që ai e tejkalon nivelin e parashikuar, të cilin e kushtëzon mënyra e zhvillimit të mësimit gjatë këtij viti shkollor, pa dyshim që ne do ta rishikojmë shpërndarjen e pikëve në test dhe mënyrën e vlerësimit. Ju uroj shumë suksese për provimin e radhës”
Kjo ndëhyrje e Kushit në rrjete sociale erdhi vetëm pak minuta, pasi zyrtarët e Qendrës së Shërbimeve Arsimore (QSHA) rrëzuan zyrtarisht pretendimet e maturantëve.
Madje, njëra prej zyrtareve të QSHA-së shkoi shumë larg, kur aludoi se nxënësit që ankohen për vështirësinë e tezës së provimit mund të jenë “kopjacë”.
“Nxënësit e mirë nuk kanë pasur vështirësi…Pastaj nxënës që kanë hyrë me mendimin që ‘unë do kopjoj’, është gjë tjetër gjë kjo. Aty ka pasur ushtrime të nivelit edhe për nxënësit mesatar”, tha përfaqësuesja e QSHA-së.
Me shumë mundësi, kjo shprehje tërësisht e papeshuar mirë nga zyrtarja e strukturës që ka hartuar tezën e provimit, ka detyruar Kushin që të nis postimin e saj me “Të dashur maturantë!”
Por, teksti emocional i ministres së Arsimit dhe premtimi i saj për mundësinë e rishikimit të testit nëse do të konstatohen problematika, u konsiderua si një “lugë bosh” nga maturantët protestues.
Dhe, në fakt, dyshimi i tyre ka një bazë reale. Diskutimet për vështirësinë e lartë të tezës së Matematikës kanë nisur shumë herët në radhët e maturantëve dhe mësuesve të lëndës në gjimnazet e Shqipërisë.
Pak javë më parë, Ministria e Arsimit dhe strukturat vartëse të saj kanë shpërndarë programin orientues për provimet e Maturës.
Nxënësit kanë konstatuar se ushtrimet orientuese për Matematikën ishin të një niveli shumë të lartë, përtej dijeve që ata kanë marrë gjatë dy sezoneve të cunguara për shkak të Covid-19 në vitet shkollore 2019-2020 dhe 2020-2021.
Shumë prej tyre kanë njoftuar strukturat arsimore, përfshirë edhe drejtoritë rajonale e Qendrën e Shërbimeve Arsimore (QSHA) për pretendimet e tyre kohë përpara se të hartohej dhe miratohej teza përfundimtare e testit të Matematikës.
Këtë shqetësim e ka raportuar rreth dy javë para testimit të Matematikës edhe “Boldnews.al”, në një shkrim të datës 2 Qershor 2021.
Por, askush nga autoritetet arsimore, përfshirë edhe Ministren e Arsimit, nuk ka reflektuar për shqetësimet e maturantëve.
Tashmë, që protesta e nxënësve u mbërriti pranë dyerve të institucioneve, ministrja Kushi u premton të rinjve të revoltuar dhe prindërve të tyre mundësinë e rishikimit, në rast se do të konstatohen problematika.
Pra, shumë thjesht-Kushi dhe vartësit e saj premtojnë se do të shohin tani, atë që duhet ta kishin parë prej shumë javësh.
Lëvizja e ministres Kushi duket si një tentativë e qartë për të zbehur revoltën e maturantëve, të cilët deklaruan se do të bojkotojnë provimin e fundit, atë “me zgjedhje”, në rast se Ministria e Arsimit nuk do të marrë parasysh kërkesën e tyre për zbritjen e pikëve të pyetjeve të vështira dhe jashtë kurrikulës në testin e Matematikës.
Këto orë të pasdites, por edhe gjatë të dielës, kur është njoftuar protesta e radhës, autoritetet qeveritare do të synojnë që të shkatërrojnë protestën e maturantëve, siç kanë bërë edhe më herët.
Ministrja e Arsimit, Evis Kushi, ndoshta po e kupton se lëvizja, fillimisht e paorganizuar mirë e maturantëve këtë të Shtunë, në ditët në vijim mund t’i kushtojë asaj vendin e punës, në rast se vijon t’i shpërfillë kërkesat e tyre të drejta.
