Shehaj thumbon Bashën: PD s´ka nevojë për një lider që ankohet dhe gjen alibi

Agron Shehaj dhe Lulzim Basha

Agron Shehaj, kandidat për kreun e PD, i cili mori mandatin e deputetit në zgjedhjet e 25 prillit, përmes një postimi në rrjetet sociale, ka sqaruar sepse po garon për drejtimin e partisë më të madhe opozitare.

Pavarësisht se pohon se është një garë e pabarabartë, ku mungojnë rregullat e lojës, Shehaj thotë se ka hyrë për të zgjidhur dhe për t´u përballur me problemet.

Ai shprehet se PD ka nevojë për një lider që nuk ankohet apo që gjen alibi për humbjen, ndërsa i bën thirrje demokratëve që në 13 qershor të mbështesin me votë ndryshimin.

“Në takimet e Tiranës, sikurse në takimet të tjera, më është përsëritur pyetja e njëjtë nga demokratët: përse i jam futur një gare të pabarabartë?

Do të doja që Shqipëria të ishte si vendet perëndimore ku liderët e partive të ishin të përgjegjshëm e të jepnin dorëheqjen pas dështimeve të njëpasnjëshme. Do doja që gara brenda partisë sonë të ishte e barabartë dhe me rregulla të ndershme loje, sikurse edhe jemi duke ia kërkuar këto standarde për zgjedhje parlamentare Ramës.

Por unë kam hyrë në politikë për t’i përballur dhe zgjidhur këto probleme. Nuk jam në politikë për t’u ankuar për to apo për ti shmangur ato. Mendoj që edhe PD për këtë lloj lideri ka nevojë, për një lider që garanton fitore pavarësisht vështirësive, pengesave apo pabarazive. Një lider që nuk ankohet apo kërkon alibi pas çdo dështimi”, shprehet Shehaj.