I ftuar në emisionin “Euro Mania” në News 24, trajneri Mirel Josa ka bërë një analizë të Europianit, që starton mbrëmjen e sotme, nga ora 21:00, me ndeshjen Turqi-Itali.
Josa ka thënë se për shkak se luhet në vende të ndryshme, skuadrat duhet të ambientohen shpejt. Gjithashtu më tej ai goli edhe për problemet me virusin, duke thënë se lojtarët duhet të ishin vaksinuar më shpejt.
Për sa i përket favoritëve, tekniku kryeqytetas është shprehur se Franca është në avantazh ndaj të tjerëve, por shtoi më tej se edhe ata kanë probleme.
“Fakti që Europiani luhen në disa vende, është diçka pozitive. Skuadrat nuk luajnë vetëm, në një fushë. E kemi parë Europianin të luhet në dy vende, por tani do të jetë ndryse, pasi edhe skuadrat duhet të ambientohen shpejt edhe me kushtet atmosferike.
Ambientimi me kushtet atmosferike, që është kryesorja në futboll, 2-3 ditë është normale për një skuadër dhe janë gjëra që mund të ndikojnë. Problemi kryesor këtu do jetë raportet që do kenë me pandeminë. Po shikojmë një Spanjë, ku pandemia ka qenë shumë intensive. Mund të themi që kanë probleme që në ndeshjet e para. Them se Itali është një skuadër që ka pasur një ecuri të mirë, por u godit nga dy mesfushorë, Sensi dhe Pelegrini, kanë qenë dy lojtarët kryesorë që përdorte Mançini.
Skuadra përkujdesjen do e kenë në lidhje me virusin. Problemi i vaksinimit është një tjetër problem. Edhe këtu në Shqipëri duhej të bëhej më parë kjo, për stafet edhe sportistët. Kontaktet mes njëri-tjetrit janë të shumta. Mendoj se në Europian janë shumë të kujdesshëm në këtë drejtim.
Nuk duhet të heqim dorë nga surprizat që mund të ndodhin. E kemi parë edhe në vitet e kaluara, kanë qenë të shumta surprizat, sidomos në Europian. Franca ka shumë lojtarë fitues dhe janë padyshim favoritët. Benzema është një sulmues shumë i mirë. Mund të them që Franca ka disa probleme në qendër të mbrojtjes. Mendi nuk ka luajtur shumë kohët e fundit. Megjithatë kanë lojtarë të tjerë që mund t’i zëvendësojnë. Kanë skuadër të re në moshë.
Surprizat? Te Belgjika duhet të shikojmë mënyrën se si luan tani. Të shikojmë ndryshimet e Belgjikës së kaluar. Unë them se Belgjika është një skuadër shumë e mirë. Ka një lojtar cilësor si De Bryjne.
Faktin që Lëv ka thënë se do largohet nga Gjermania, nuk e shikoj si diçka pozitive. Te Gjermania nuk kam ndonjë shpresë të madhe, sepse ka ndryshuar stil loje”, tha Josa.
