Tritol me dron biznesit të Lefter Kokës në Durrës

Një zyre biznesi e Lefter Kokës i është vendosur tritol me dron. Ngjarja ka ndodhur dy ditë më parë në qytetin e Durrësit.

Për ngjarjen, policia dha një njoftim të shkurtër, por pa specifikuar metodën që kishte ndjekur autori dhe as emrin apo inicialet e deputetit. Uniformat blu bënë me dije se nga shpërthimi i lëndës eksplozive janë shkaktuar dëme të vogla materiale.

Për ngjarjen është vënë në pranga Gentian Meta, për të cilin Gjykata e Durrësit ka dhënë masën e sigurisë “arrest me burg”.

Biznesi në fjalë, kantinë vere, menaxhohet nga një person i besuar i Lefter Kokës, ndërkohë që personit të arrestuar iu gjet edhe pulti me të cilin dyshohet se kishte komanduar dronin.

Në hetim ka marrë pjesë dhe njësia e antiterrorit në Policinë e Shtetit.

Policia arrestoi dhe menaxherin e lokalit në pronësi të Metës, të cilit iu gjet një armë zjarri, ndërkohë që dyshimet janë se ngjarja ka ndodhur për shkak të konkurencës.