Kampionati Europian i futbollit që starton sonte, jo vetëm që ka një pritshmëri të madhe, të jashtëzakonshme duhet thënë por edhe në terma financiarë do të jetë tepër i veçantë.
Sipas një kalkulimi të bërë, UEFA synon dhe pret të arkëtojë një shumë rekord prej 2 miliardë Euro prej të cilave, 850 mln euro të jenë fitim për institucionin, para që nevojiten për financimin e sportit më të bukur të kontinentit dhe për të rregulluar financat e goditura nga pandemia.
Për të kaluar te skuadrat pjesëmarrëse, edhe ato do të përfitojnë shuma të majme madje fituesi i Kampionatit Europian do të fusë në “xhep” plot 30 mln Euro për trofeun.
UEFA ka bërë një plan financiar për 24 skuadrat pjesëmarrëse të Euro 2020 të cilat vetëm për praninë e tyre në fazën finale kanë të garantuar 9.5 mln Euro.
Për të vijuar me përfitimet, çdo fitore në grup vlen 1 milionë euro për çdo skuadër dhe barazimi 500 mijë euro ndërsa kualifikimi në 1/8 u shton fond të sigurtë edhe 1.5 mln euro ndërsa në çerekfinale 2.5 mln euro të tjera, në gjysmëfinale 4 mln dhe pjesëmarrja në finale 5 mln Euro.
Duke parë shifra të tilla kuptohet edhe rëndësia e një evenimenti të tillë që sigurisht mbush arkat e UEFA-s, pjesëmarrësve dhe në fund fiton futbolli dhe tifozët kudo jo vetëm në Europë pasi spektakli është i garantuar.
