Basha: Nuk ka bashkëpunim me Ramën, dalim më të fortë nga gara

Lulzim Basha, i cili më 13 qershor kërkon mandatin e 3 si kryetar i PD-së, u shpreh gjatë takimit me demokratët e Fierit, se të dielën sytë e shqiptarëve do jenë përsëri drejt PD-së, si e vetmja shpresë për demokracinë dhe ndryshimin që njerëzit duan.

“Nga kjo garë të dalim më të bashkuar dhe më të vendosur për të vazhduar betejën. Nuk do të rrëzohet demokracia, nuk do të rrëzohet Shqipëria, do rrëzohet regjimi Rama-Doshi”, tha Basha.

Ai tha se përkundër masakrës zgjedhore, anembanë Fierit, sikundër anembanë Shqipërisë, demokratët vendosën zemrat e tyre, vendosën pasionin e tyre për liri dhe demokraci, përballë makinerisë më mizore të masakrës zgjedhore, elektorale që ka vënë ndonjëherë nga ndonjë forcë politike, jo vetëm në Shqipëri, por në Ballkan.

“Me sakrificat tona deri me sakrificat sublime, deri me djegien e mandateve për të nxjerrë para shqiptarëve dhe para botës regjimin e vërtetë dhe për tu mos u bërë fasadë e atij regjimi. Deri në betejën tonë epike kundër makinerisë masakrës zgjedhore ne provuam dhe faktuam se jemi ata që ishin në dhjetorin e 1990, jemi njerëzit e vlerave, jemi njerëzit e lirisë të demokracisë. Ne faktuam forcën tonë që e projektuam më së miri duke trokitur derë më derë me një program real dhe realist i cili jepte zgjidhje të jashtëzakonshme që Edi Rama dhe banda e tij e babëzitur e të korruptuarve dhe horrave, i shtoi dhe i shtroi këmbëkryq në shtëpitë e shqiptarëve, duke ia zbrazur sofrat duke ia boshatisur xhepat dhe duke ia larguar rininë dhe fëmijët nga vatrat e tyre”, tha ai.

Sipas tij, më 25 prill, shumica është dhunuar, pakica përkohësisht ka marrë peng Shqipërinë dhe shqiptarët.

“Ky nuk është më një vend demokratik, ky është një regjim dhe ne sot kemi mbi supet tona dy detyra. Të parën, që shqiptarët kanë besuar, që e deshën me 25 prill dhe e duan akoma më shumë sot që janë edhe më të dëshpëruar, edhe më të pashpresë, ndryshimin e Fierit, ndryshimin e Shqipërisë, për të cilën vetëdija, programi dhe vendosmëria jonë e 25 prillit, dha rezultat ehe për të cilën kemi akoma vetëdijen për të ecur përpara por misioni bazë i kësaj partie sot është dhe misioni me të cilin ka lindur kjo familje e madhe, kjo parti e madhe demokratike. Është misioni i rikthimit të demokracisë sepse në momentin që ky regjim asgjëson vullnetin e shumicës, nuk ka rrugë tjetër përveç përballjes me të, betejës me të, me një objektiv, rrëzimin e regjimit”, tha ai.

Basha u shpreh se misioni i rrëzimit të regjimit do të thotë angazhim në një betejë, në një betejë të përditshme, në një betejë në të gjitha fushat dhe format.

“Edi Rama bën sikur shtrin dorën për bashkëpunim , me dorën tjetër heq mësuesit dhe mësueset e fierit, personelin shëndetësor vetëm se ka marrë pjesë në fushatën elektorale apo ka marrë pjesë në aktivitetet elektorale të Partisë Demokratike apo vetëm se është demokrate apo demokrat. Vazhdon të godas sipërmarrjen. Ka shkuar të marrë TVSH që premtoj që nuk do ta merrte. Godet banesat dhe i lë pa çati të mjerët dhe me dorën tjetër kërkon bashkëpunim, bën sikur kërkon bashkëpunim. Përgjigja ime ndaj kësaj po kështu është e qartë dhe pa asnjë ekuivok, një Jo e prerë dhe finale.

Dora e Edi Ramës është e mbushur me helmin e bashkëfajësisë. Të rrokësh atë dorë do të thotë të shkelësh mbi sakrificën tuaj. Të rrokësh atë dorë do të thotë të pranosh masakrën zgjedhore dhe rënien e demokracisë. Të rrokësh atë dorë do të thotë të bëhesh bashkëfajtor. Nuk ka bashkëpunim me Edi Ramën, ka vetëm betejë me të dhe me regjimin e tij”, tha Basha.