Një 47-vjeçar është vënë në pranga në vazhdën e operacionit të koduar “Agimi” që disa ditë më parë çoi në zbulimin e një laboratori të mbyllur në Fushë-Krujë, që shërbente për kultivimin e bimës narkotike kanabis sativa me anë të ngrohjes me llamba.
Polici njoftoi mëngjesin e 30 Majit arresimin e e 16 personave dhe shpalljen në kërkim të 24 të tjerëve.
Këtë të Enjte, një tjetër person u vu në pranga në Kakavijë.
“Shërbimet e Stacionit të Policisë Kufitare Kakavijë bënë të mundur kapjen e shtetasit të shpallur në kërkim E.K., 47 vjeç, banues në Nikël, Krujë, i akuzuar për veprën penale “Kultivim i bimëve narkotike” kryer në bashkëpunim”, njoftoi policia.
“Ky shtetas ishte shpallur në kërkim nga Komisariati i Policisë Krujë, në kuadër të operacionit policor antikanabis të koduar ‘Agimi’, pasi dyshohet se në bashkëpunim me 8 shtetas të tjerë, ka kultivuar bimë narkotike në fshatin Nikël, Krujë. Si rezultat i operacioni antikanabis ‘Agimi’ që u zhvillua më datë 30.05.2021, në territorin e rrethit të Krujës, u arrestuan në flagrancë 16 shtetas, u proceduan në gjendje të lirë 3 shtetas dhe u shpallën në kërkim 24 të tjerë. Shtetasi E. K. iu dorëzua shërbimeve të Komisariatit të Policisë Krujë, për procedura të mëtejshme”, njoftoi më tej policia.
