Propozimi i Kadillit: Kryetari i PD me mandat 4-vjeçar. Nëse humbet zgjedhjet, largohet dhe nuk kandidon më

Fatbardh Kadilli, një nga katër kandidatët në garën për kryetar të Partisë Demokratike propozon që kryetari i PD të zgjidhet vetëm për një mandat 4-vjeçar.

Sipas Kadillit, nëse partia nën drejtimin e kryetarit nuk fiton zgjedhjet, atëherë ai duhet të largohet dhe të mos kandidojë më për të marrë drejtimin e forcës politike.

Kadilli e ka shprehur propozimin përmes një videoje të publikuar në rrjetet sociale.

“PD-ja ime dhe juaja është streha e gjithkujt, por nuk mund te jete kurrë peng i askujt! Manifesti im politik i jep fund kryetarit-pronar. Propozimi im është që Kryetari të zgjidhet vetëm për një mandat 4-vjeçar dhe vetëm me një mision: Të fitojë zgjedhjet politike, me PD forcë e parë. Kryetari ose fiton dhe bëhet Kryeministër, ose shkarkohet dhe shkon në shtëpi. Kryetari që humb zgjedhjet nuk mund të rikandidojë më. Ky është manifesti im politik. Unë jam Bardh Kadilli. Në garë për një PD të hapur, të pastër, të bashkuar, fituese”, ka nënvizuar Kadilli.