Peticion për rikthimin e abonesë, OP: U dëmtuan mijëra familje

Pas heqjes së abonesë së përgjithshme për 3 muaj nga Bashkia e Tiranës, Klodian Leka, anëtar i organizatës politike “Lëvizja për Universitetin” në një deklaratë për median u shpreh se heqja e abonesë është e padrejtë dhe ndikon drejtpërdrejtë në ekonomitë familjare.

“Transporti është shumë i rëndësishëm për të gjithë, heqja e abonesë ndikon drejtpërdrejtë në ekonomitë familjare. Kjo gjë më së shumti prek shtresat më të mëdha sociale dhe në fund të ditës ju cenohet edhe e drejta për të lëvizur lirshëm në qytet.

Megjithatë ne kemi zhvilluar një peticion për mbledhjen e firmave të qytetarëve lidhur me abonenë dhe cështjet e tjera të transportit. Bëmë një pyetësor se sa ndikim ka pasur tek ta heqja e abonesë dhe nga 800 persona, 70 përqind mendonin se kjo i gjë i dëmton shumë në aspektin financiar dhe jo vetëm, sepse tejmbushja e autobuzëve është skandaloze”– u shpreh Leka.

I pyetur se cilat janë pikat që janë përfshirë në peticion përveç çështjes së abonesë Leka u përgjigj duke thënë se janë 3 pika që kërkohen.
“Përveç vënies së abonesë së përgjithshme do kërkojmë edhe përmirsimin e kushteve të linjave të transportit dhe kompensimin e abonesë për ato që kanë probleme ekonomike.
Është një vendim i padrejtë dhe ne do i kërkojme llogari Bashkisë sepse është fajtorja dhe përgjegjësja kryesore për këtë situatë, heqja e abonesë dhe gjendja aktuale dëmton jo vetëm njerëzit që shkojnë në punë përditë por krijon edhe strese, sherre e zënka në linjat e transportit.”

“Ne jemi vendosur në 5 pika ku njerëzit mund të vijnë dhe të nënshkruajnë peticionin, të Piaca, 9 katëshet, hyrja e Muzeut dhe pika të tjera dhe do jemi aty 10 ditë deri në dy javë për ti dhënë zgjidhje kësaj situate”-përfundoi Leka.