Deputetja e zgjedhur Albana Vokshi i kërkon kryeparlamentarit Gramoz Ruçi të tërhiqet nga vendimi që ndalon pjesëmarrjen e gazetarëve në komisionet parlamentare.
Vokshi përshëndet protestën e gazetarëve që e kundërshtojnë vendimin e Kuvendit, duke e cilësuar censurë. Ajo po ashtu mbështet dhe reagimet e delegacionit të BE në vendin tonë dhe ambasadoren franceze, zëra që mbështesin gazetarët.
Sipas Vokshit, Gramoz Ruçi duhet të kërkojë ndjesë publikisht dhe të tërheqë pa vonesë vendimin e gabuar.
Ajo shton se kufizimi i lirisë së medias në një vend që pritet të hapë negociatat me BE është po aq i papranueshëm sa vjedhja e votës.
“Gazetarët e thanë fjalën e tyre. Kurajozë dhe me integritet, gazetarët e ngritën zërin kundër censurës së Parlamentit dhe kundër izolimit të tyre. Edhe BE e tha fjalën e vet kundër pengimit të gazetarëve për të raportuar lirshëm në Kuvendin e Shqipërisë. Një falenderim edhe për qëndrimin e ambasadores së Francës pro lirisë se medias dhe kundër censurës shtetërore. Tani i takon Kuvendit të Shqipërisë të tërhiqet. Vendimi i paligjshëm, antikushtetues dhe antidemokratik që pengon gazetarët të bëjnë punën e tyre në Kuvend duhet të zhbëhet. Ky është një vendim politik, i marrë nga Byroja e Kuvendit, e cila drejtohet nga Granoz Ruçi dhe jo nga Sekretari i Përgjithshëm i Kuvendit. Si I tillë, në vend të justifikimeve, Gramoz Ruçi duhet të kërkojë ndjesë publikisht dhe të tërheqë pa vonesë vendimin e gabuar! Kufizimi i lirisë së medias në një vend që pritet të hapë negociatat me BE është po aq i papranueshëm sa vjedhja e votës”, shkrehet Vokshi në një reagim në rrjetet sociale.
