Vëllezërve Sallaku u sekuestrohen 3 milionë euro pasuri në Durrës

Gezim Sallaku

Gjykata e Durrësit ka vendosur sekuestro preventive për disa prona që kapin vlerën rreth 3 milionë euro.

Aksione kompanish, toka, apartamente, makina nën pronësi të Gëzim e Saimir Sallakut dhe një tjetër personi me të cilin dy vëllezërit, sipas policisë kanë lidhje shoqërore, janë vënë nën sekuestro nga gjykata me kërkesë të prokurorisë.

Pronat dyshohet se janë përfituar nga veprimtaria kriminale e Gëzim Sallakut dhe janë të regjistruara edhe në emër të vëllait të tij Saimir Sallaku dhe R.K.

Hetimet

Aksioni erdhi pas hetimeve 3-vjeçare nga policia dhe prokuroria e Durrësit.

“Njësia për Hetimin e Krimit Ekonomik në Drejtorinë Hetimore në Departamentin e Policisë Kriminale, në bashkëpunim me Prokurorinë e Rrethit Gjyqësor Durrës, në vitin 2018, nisur nga disa transferta të dyshimta bankare të shtetasve të sipërpërmendur, ka filluar hetimin për veprën penale ‘Pastrimi i produkteve të veprës penale ose të veprimtarisë kriminale’”, sqaroi policia.

Gëzim Sallaku është dënuar në shtetin italian nga viti 1999 – 2008 për vepra të ndryshme penale.

Pasuritë e sekuestruara

Pasuritë ndaj të cilave është vendosur sekuestro preventive janë:

– 100% të aksioneve të shoqërisë “GSA Sallaku” sh.p.k, me aktivitet “Import, eksport, tregti autoveturash, kamionësh etj”, me seli në Durrës, me ortak të vetëm dhe administrator shtetasin Gëzim Sallaku;

– 2 apartamente, në Durrës, në emër të shtetasit Gëzim Sallaku;

– 20.600 m2 sipërfaqe toke arë, në Durrës, në emër të shtetasit Gëzim Sallaku;

– 1000 m2 sipërfaqe toke truall, mbi të cilën janë ndërtuar 2 banesa me sipërfaqe 140 m2 secila, në Durrës, në emër të shtetasit Gëzim Sallaku;

– Një godinë banimi dykatëshe dhe 2 apartamente banimi, në Durrës, në pronësi të shtetasit R.K.;

13 automjete të markave të ndryshme në pronësi të shoqërisë tregtare “GSA Sallaku”.

“Vazhdon puna nga Njësia e Hetimit të Krimit Ekonomik e Financiar, për identifikimin e pasurive të tjera të këtyre personave dhe lidhjeve të tyre familjare dhe shoqërore”, thanë burime zyrtare nga policia.