Kolegji Zgjedhor sapo ka dhënë vendimin përfundimtar në lidhje me paditë e bëra nga PD dhe Lsi përsa i përket shkeljeve të bëra në qarkun e Shkodrës. Pak çaste më parë u rrëzua kërkesa e palëve politike për paraqitjen e provave shtesë gjatë hetimeve, ndërsa tani u dha vendimi për rrëzimin e pretendimeve të PD dhe LSI që kërkonin shpalljen të pavlefshme dhe ripërsëritjen e zgjedhjeve në qarkun e Shkodrës.
Kolegji Zgjedhor e ka konsideruar këtë padi të bërë nga palët politike si të pa mbështetur në ligj dhe pretendimet e tyre i ka konsideruar të pabazuara në fakte konkrete.
Për këtë vendim të marrë nga Kolegji Zgjedhor ka dhënë një deklaratë edhe përfaqësuesi politik i partisë Demokratike, Marash Logu. Ai e ka konsideruar këtë si një provë se gjyqtarët e Kolegjit Zgjedhor nuk duan të bëjnë drejtësi për të hetuar shkeljet e bëra gjatë zgjedhjeve të 25 prillit.
“Këta gjyqtarë janë të vendosur për të mos bërë drejtësi për zgjedhjet e 25 Prillit. Ky nuk është një lajm i keq vetëm për PD por edhe për të gjithë shqiptarët që presin drejtësi për shkeljet e bëra gjatë 25 prillit”– tha Logu.
