Ndryshe nga se flitet në Spanjë, e ardhmja e Leo Messi nuk është aspak e përcaktuar. Për të ndezur edhe një herë këtë teme e cila dukej e mbyll me Laporta në krye të Barcelonës ka menduar Jorge Mas, presidenti i Inter Miami në MLS: “Unë dhe David Beckham, bashkëpronar tjetër i klubit, po punojmë seriozisht mbi temë.
Ambicia jonë është të sjellim këtu lojtarët më të mirë dhe Messi është pa diskutim një i tillë, mbase më i mirë i të gjithë kohërave. Jam optimist se ai mund të luaj me fanellën e Inter Miami”, u shpreh Jorge Mas duke shtuar: “Ardhja e tij mund të ndryshojë qasjen tonë, dëshirojmë të ndërtojmë një skuadër me vlera botërore”, theksoi presidenti i Inter Miami.
Në fakt deklaratat e Jorge Mas kanë dhe një bazë logjike, një projekt ky që është lakuar edhe në mediat spanjolle. Barcelona ka bërë gati për sulmuesin argjentinas një projekt 10-vjeçarë ku parashikohet që Messi fillimisht të luaj edhe dy vite tek Barcelona, si kapiten dhe si lider, më pas të transferohet në SHBA për të luajtur tek klubi i Beckham për dy vite për tu rikthyer sërish në Barcelonë ku e pret një rol si ortak strategjik dhe ambasador i klubit në botë, një projekt që do të zgjas minimalisht deri në 2031.
