143 vjetori i ‘Lidhjes’/ VV: Serbia ende nuk ka hequr dorë nga nga projekti shovinist, ‘Lidhja e Prizrenit’ e vetmja rrugë për bashkim kombëtar

Lëvizja Vetëvendosja me qendër në Shqipëri, ka zhvilluar ditën e sotme homazhe pranë monumentit të vëllezërve ‘Frashëri’, me rastin e 143 vjetorit të ‘Lidhjes së Prizrenit’.

Të pranishën në homazhe ishin edhe deputetë të VV të parlamentit të Kosovës.

Gjatë fjalës së tij përfaqësuesi i VV me qendër në Shqipëri Boiken Abazi, foli për rëndësinë historike dhe aktuale të kësaj date dhe projektit kombëtar çlirimtar shqiptar.

Postimi i VV:

143 vjetori i Lidhjes Shqiptare të Prizrenit shënohet në Tiranë

Aktivistët e Lëvizjes VETËVENDOSJE! shënuan sot në Tiranë 143 vjetorin e Lidhjes Shqiptare të Prizrenit. Në aktivitetin e zhvilluar te Varri Monumental i “Vëllezërve Frashëri” në Parkun e Madh të Liqenit Artificial të Tiranës, të ftuar ishin edhe deputetët e Kuvendit të Kosovës Avni Dehari, Gani Krasniqi si dhe veprimtari Shaip Haxhiu, figura me kontribut të çmuar në përpjekjet për çështjen kombëtare dhe çlirimin e Kosovës.

Pas nderimit të veprës së Vëllezërve Frashëri, drejtori ekzekutiv i Qendrës së Lëvizjes në Shqipëri, Boiken Abazi, foli për rëndësinë historike dhe aktuale të kësaj date dhe projektit kombëtar çlirimtar shqiptar, duke ia kaluar më tej fjalën deputetit Avni Dehari. Z. Dehari tha se programi politik i Lidhjes Shqiptare të Prizrenit është ende sot e kësaj dite i patejkaluar. Ajo u formua si përpjekje e shqiptarëve për t’i rezistuar copëtimit të trojeve, për të themeluar shtetin e bashkuar shqiptar dhe kjo mbetet ende detyrë për t’u realizuar. Veprimtaria politike e Abdyl Frashërit, Ymer Prizrenit, Sylejman Vokshit, si dhe e atdhetarëve të tjerë rilindas themelues dhe pjesëmarrës të Lidhjes Shqiptare të Prizrenit, janë manifesti më i çmuar politik i çështjes kombëtare që rezonon në aktualitet.

Deklaratat e lëshuara sot në Tiranë në Samitin e Ballkanit Perëndimor nga kryeministrja e Serbisë, Ana Bërnabiç, kundër pavarësisë dhe sovranitetit të Republikës së Kosovës, dëshmuan edhe njëherë se kohërat kanë ndryshuar por Serbia ende nuk ka hequr dorë nga projekti i saj shoven dhe ekspansionist në rajon. Kjo është një arsye më shumë pse Lidhja Shqiptare e Prizrenit shenjon rrugën që duhet të ndjekim drejt bashkimit kombëtar.

Lidhja është gjallë!

Tiranë, 10 qershor 2021

Lëvizja VETËVENDOSJE!

Qendra në Shqipëri