Shkarkimi i Metës, Maliqi: Seancë qesharake, s’ka asnjë shkelje Kushtetuese

Seancë qesharake, e ka cilësuar deputeti Lefter Maliqi, atë që do të zhvillohet sot ku pritet që të votohet kërkesa e Komisionit Hetimor për shkarkimin e Ilir Metës nga posti i Presidentit të Republikës.

Para nisjes së seancës parlamentare, Maliqi tha se Presidenti nuk ka bërë asnjë shkelje Kushtetuese, mbi të cilën mund të bazohen deputetët për shkarkimin e Metës.

“I bëj një thirrje deputetëve dhe veçanërisht Gramoz Ruçit që të reflektojnë, pasi Presidenti i Republikës nuk ka bërë asnjë shkelje”, tha Maliqi. Deputeti shprehu bindjen se në shtator shqiptarët do të dalin në protesta kundër Qeverisë dhe Rilindjes, e cila ka mbjellur varfërinë dhe krimin në vend.

“Jam i bindur se Gjykata Kushtetuese, nëse do të veprojë si një trupë e pavarur do të rrëzojë zgjedhjet moniste të 2019-ës, sikundër vjeshta që do të vijë do t’iu përkasë shqiptarëve, që do të reagojnë jo vetëm ndaj vjedhjes së votave më 25 prill, por edhe ndaj keq qeverisjes, varfërisë, krimit”, tha Maliqi.