Kryeministri Edi Rama u tregua i prerë sot lidhur me vendimin për shkarkimin e Ilir Metës nga posti i Presidentit. Ndryshe nga herët e tjera, Rama ka mbajtur një fjalim në Parlament që ka zgjatur rreth 1 minutë, ndërsa akuzoi ish-aleatin e tij në qeverisje, se e ka tradhëtuar misionin e Presidentit.
Rama tha se Meta e ka poshtëruar Kushtetutën, ka shembur institucionin e garantit të unitetit kombëtar, ka minuar kufirin e ndarjes së pushteteve, ka turpëruar Shqipërinë në marrëdhënien krejt speciale me SHBA.
“Ilir Meta ka shkarravitur fytyrën e shtetit shqiptar në marrëdhënie me përfaqësitë diplomatike, i ka hunbur të gjitha shanset që i janë dhënë bujarisht në mënyrë të përsëritur për tu kthyer në binarë.
Shqipëria nuk mund të mbajë më në kurriz Ilir Metën. Keqardhje për mikun tonë të dikurshëm Ilir, por Meta i sotëm nuk mund të mbajë më statusin që i dha Kuvendi”, tha Rama.
Paralelisht me fjalën e Kryeministrit, sipas të cilit 90% e shqiptarëve nuk e duan më Ilir Metën, deputetët janë duke votuar në mënyrë të fshehtë për shkarkimin apo jo të presidentit të republikës, që në fakt do të shënonte një precedent në këto 30 vite të demokracisë.
Menjëherë pas fjalës në Kuvend, Rama u largua nga dera e pasme, duke shmangur çdolloj përballje me gazetarët.
Për të shkarkuar Metën është e nevojshme vota e 94 deputetëve, që duke parë formacionet dhe renditjen e të ashtuquajturës opozitë parlamentare, janë të arritshme.
Çështja e shkarkimit të presidentit do të jetë subjekt më pas i Gjykatës Kushtetuese, e cila ka 3 muaj kohë për t’u shprehur në lidhje me aktin e parlamentit në largim.
