Kuvendi miratoi sot me 104 vota pro shkarkimin e Ilir Metës nga detyra e Presidentit të vendit. Kundra shkarkimit votuian 7 deputetë, ndërkohë që 3 të tjerë abstenuan.
Pas disa orë diskutimesh, deputetët nën komandën e Kryeministrit Edi Rama, çuan deri në fund projektin e tyre për shkarkimin e Metës nga posti i Presidentit, ndërsa formalisht në seancë u lexua një raport ku paraqiteshin shkeljet Kushtetuese që sipas tyre Kreu i Shtetit ka konsumuar.
Në votimin për shkarkimin e Presidentit morën pjesë 115 deputetë, ndërsa më herët raporti i Komisionit Hetimor parlamentar, ku renditeshin shkeljet ligjore dhe Kushtetuese, u miratua nga 104 deputetë, 7 kundra, 2 abstenime dhe 1 fletë rezultoi e pavlefshme.
Tashmë i takon Gjykatës Kushtetuese të shprehet lidhur me vendimin e Kuvendit, që prej më shumë se dy vitesh funksionoi me rreth 120 deputetë nga 140 që parashikon Kushtetuta, shumica e të cilëve ishin të bindur ndaj Kryeministrit, pavarësisht se formalisht luanin rolin e një opozite parlamentare, që fare mirë quhet e emëruar nga Rilindja.
Vendimi i Kuvendit, bazuar në Kushtetutë, është hapi i parë, pasi gjithçka do të shqyrtohet nga Gjykata Kushtetuese, e cila do të vendosë nëse procedurat e ndjekura për shkarkimin e Presidentit janë respektuar dhe nëse çështjet për të cilat Kuvendi vendosi shkarkimin qëndrojnë apo jo. Kjo do të thotë se Kreu i Shtetit do të vijojë që të qëndrojë në detyrë, deri në shprehjen e një vendimi nga Kushtetuesja.
Ky është rasti i parë që Parlamenti shqiptar ndërmerr një nisëm për shkarkimin e Presidentit, duke mos lejuar që ai të përfundojë mandatin e tij në Krye të Shtetit.
Edhe pas zgjedhjeve të 1997, kohë kur President i vendit ishte Sali Berisha, Kuvendi nuk arriti të ndërmerrte hapat për shkarkimin e tij nga mandati i dytë Presidencial, pasi ai u dorëhoq në atë kohë, menjëherë pas zgjedhjeve, dhe postin e Kreut të Shtetit e mori Rexhep Mejdani.
Hetimi parlamentar për Ilir Metën u nxit nga Kryeministri Edi Rama dhe jo rastësisht në Komisionin Hetimor Parlamentar u vendosën deputetë që nuk do të jenë pjesë e legjislaturës së re që nis në shtator, pasi ose nuk u vendosën në listat e kandidatëve, ose nuk arritën të marrin mandatin. Presidenti Ilir Meta në deklarimet e tij publike ka thënë se nuk e njeh hetimin parlamentar, madje nuk ka marrë pjesë as në seancën kur u thirr nga Komisioni për të dhënë shpjegime.
Gjatë seancës parlamentare, Kryeministri Edi Rama, tha se “Ilir Meta ka shkarravitur fytyrën e shtetit shqiptar në marrëdhënie me përfaqësitë diplomatike, i ka hunbur të gjitha shanset që i janë dhënë bujarisht në mënyrë të përsëritur për tu kthyer në binarë.
Shqipëria nuk mund të mbajë më në kurriz Ilir Metën. Keqardhje për mikun tonë të dikurshëm Ilir, por Meta i sotëm nuk mund të mbajë më statusin që i dha Kuvendi”, tha Rama.
