Konfirmohen rastet e para të gripit të shpendëve në vendin tonë tonë. Ministria e Bujqësisë konfirmoi këtë të Martë se sëmundja është e pranishme vetëm në 3 vatra, që ndodhen në Njësinë Administrative Fushë- Krujë, në Njësinë Admistrative Dajt dhe në Njësinë Administrative Bujan.
Shërbimi Veterinar kreu eliminimin e shpendëve të prekur dhe të dyshimtë, si dhe mori masat për parandalimin e përhapjes së mëtejshme të sëmundjes, sqaroi më tej ministria.
Monitorimet e situatës epidemiologjike në popullatën e shpendëve nga ana e Ministrisë së Bujqësisë erdhën pas njoftimit të dhënë nga Organizata Botërore e Shëndetit të Kafshëve, për praninë e virusit të Gripit të shpendëve në disa vende të rajonit dhe më gjerë.
Autoritetet njoftuan se pas analizimit të mostrave nga rastet e dyshimta në shpendë të oborrit, në Institutin e Sigurisë Ushqimore dhe Veterinarisë (ISUV), është konfirmuar prania e Gripit të shpendëve (Influenca Aviare) e tipit H5N8.
“Urdhri i Ministrit ndalon në rang kombëtar tregtimin e shpendëve të gjallë në mjediset e hapura dhe në tregjet e kafshëve të gjalla. Lejohet lëvizja e shpendëve me destinacion thertoret, të shoqëruar vetëm me certifikatë shëndetësore veterinare. MBZHR sjell në vëmendjen e publikut respektimin e higjienës dhe gatimin në temperatura të larta të të gjitha produkteve me origjinë shtazore”, njofton ministria.
Gripi i shpendëve mund të përhapet nga shpendët te njerëzit dhe të shkaktojë fatalitete.
Rreth 1.000 raste zbulimi të gripit të shpendëve shumë patogjen (HPAI) u raportuan në 25 vende të BE / EEA dhe Mbretërinë e Bashkuar në periudhën 8 Dhjetor 2020 dhe 23 Shkurt 2021, sipas pasqyrës së fundit të HPAI në Evropë, informoi AKU në muajin Mars.
DENONCO