Prokuroria e Tiranës dorëzoi dje në gjykatë kërkesën për masën e sigurisë ndaj Mexhit Picarit dhe vajzës së tij, Dhurata Saliajt, të akuzuar për vrasjen e Kudret Saliajt. Organi i akuzës kërkon arrest me burg për babë e bijë, ndërsa argumenton se më shumë se vrasje me dashje, ata janë përgjegjës për vrasje me paramendim, pasi sipas të gjitha të dhënave ata kishin organizuar me detaje krimin.
Mexhit Picari dhe Dhurata Saliaj akuzohen për vrasje në bashkëpunim, ku babai ka rolin e ekzekutorit dhe e bija, njëkohësisht bashkëshortja e viktimës, me të cilin ishte në proces divorci, ka rolin e informatores. Sipas prokurorisë rezulton se Dhurata Saliaj, përveç të tjerash, ka thyer edhe masën e sigurisë, pasi duhej të ishte në “Arrest shtëpie”, e caktuar vitin e kaluar për akuzën e dhunës në familje.
Megjithatë, ajo jo vetëm që ishte jashtë, por për afro 20 minuta ka vëzhguar lëvizjen e Kudret Saliajt dhe avokatit të tij, Adriatik Cama, duke informuar të atin për çdo lëvizje. Në momentin kur ka parë që Saliaj dhe avokati janë ulur në lokalin pranë Gjykatës së Tiranës, ajo ka sinjalizuar babanë, i cili po ashtu është futur në të njëjtin lokal, ku më pas edhe ka qëlluar për vdekje 41-vjeçarin e ka plagosur dhe avokatin e tij.
Në kërkesën e Prokurorisë së Tiranës thuhet se një ditë para ngjarjes, mes viktimës dhe autorit ka pasur një debat të ashpër, një ndër të shumtët që ndodhnin pasi Dhurata Saliaj ishte në “arrest shtëpie” dhe gjykata kishte urdhëruar që ajo t’i takonte fëmijët vetëm të shtunën në prani të psikologes. Babai i saj, autori i dyshuar i vrasjes, Mexhit Picari, pretendon në deklarimet e tij se gjatë këtij debati ish-dhëndri e ka kërcënuar, ashtu siç e ka kërcënuar në vazhdimësi.
Djali i madh i çiftit Saliaj ditën e ngjarjes do të deklaronte para gjykatës se me cilin nga prindërit do të qëndronte. Ai nuk ka qenë i pranishëm në lokalin ku u vra i ati nga gjyshi, por ndodhej në një lokal pranë atij ku ka ndodhi ngjarja, me një kushëri të të atit. Ai është afruar pas ngjarjes, por nuk e ka lejuar policia. Mësohet se 16- vjeçari ka deklaruar se nëna e tij ushtronte dhunë ndaj tij, motrës e vëllait. Gjithashtu, ka folur për marrëdhënie të tensionuara me gjyshin dhe dajën e tij. Megjithatë, i mituri do të merret sërish në pyetje nga oficerët e Policisë Gjyqësore për konfliktet në familje mes prindërve të tij që nga viti 2013 dhe që kishin kulmuar vitin e kaluar.
Nga ana tjetër, dëshmitë e Mexhit Picarit dhe vajzës së tij kanë qenë kontradiktore, megjithëse babai deklaronte se ishte kërcënuar, por nuk ka deklaruar se në lokal ndodhej me vajzën dhe ka thënë se Kudret Saliaj e ka fyer. Sipas tij, gjithçka ka qenë e momentit, pasi menjëherë pasi e ka fyer ishdhëndri ai ka mbushur pistoletën dhe ka qëlluar ndaj tij. Ndërsa e bija, Dhurata Saliaj, ka deklaruar se ishte ftuar nga gjykata për të marrë pjesë në seancën gjyqësore.
