Duket se prania e gazetarëve brenda Kuvendit për të kryer detyrën e tyre ndaj transparencës aq shumë të munguar, ka marrë fund pas një votimi skandaloz në Byronë e Kuvendit. Por ajo që bie në sy është `shërbimi i fundit` ndaj Ramës dhe pushtetit, që bënë anëtarët e forumit më të lartë ligjvënës.
Kështu, nga 10 anëtarët e Byrosë së Kuvendit, 9 prej tyre që nuk do të jenë më deputetë, kanë votuar për të “nxjerrë” gazetarët nga Kuvendi në sesionin e ardhshëm parlamentar. Mes dhjetëshes që votoi përzënien e gazetarëve, vetëm kreu i Kuvendit, Gramoz Ruçi, do të jetë deputet në mandatin e ardhshëm.
Pjesë e Byrosë aktuale që kanë votuar pro këtij vendimi, veç Ruçit janë: Alket Hyseni, Anastas Angjeli, Besnik Baraj, Myslim Murrizi, Vasilika Hysi, Vilma Bello, Alban Zeneli, Ervin Bushati dhe Nimet Musai.
Ndryshimi në rregulloren e institucionit, kufizon gazetarët duke i penguar që të bëjnë punën e tyre. Me vendimin e fundit të Byrosë, media nuk lejohet që të bëjë detyrën, por i serviren vetëm materialet që shikon të arsyeshme Kuvendi për tu publikuar.
Vendimi në fjalë duket se i çel rrugën krijimit të një platforme të ngjashme me ERTV e Edi Ramës. Ndoshta, nëse Gramoz Ruçi do të vijojë të drejtojë Parlamentin, mund t´a quajë këtë platformë “Gramozi Tv”, Ruçi Tv, Mozi Tv, ose GR TV. Sido që të jetë emri nuk dihet nëse ajo do të mund të konkurojë përballë ERTV të liderit “global” apo nëse në platformën e kryeparlamentarit do të punësohen vullnetarisht stafe, sikundër ka ndodhur me ERTV ku “vullnetarët” thuhet se janë të shumtë.
Nga ana tjetër gazetarja e politikës, e cila ka shumë vite që ndjek punimet në Kuvend, Esiona Konomi, ka vendosur që t’i publikojë me emra e fotografi të gjithë këta ligjvënës që kanë votuar pro censurës në parlament dhe i fton për tu tërhequr nga vendimi i tyre kundër fjalës së lirë.
“Këta janë anëtarët e Byrosë së Kuvendit të cilët vendosën të lënë gazetarët jashtë, të minojnë transparencën dhe të instalojnë censurë.
Asnjë prej tyre nuk do të jetë më në Kuvendin e ri në shtator (me përjashtim të z. Ruçi).
Pra, këta që ikin, vendosin se si do koordinohet (përjashtohet) media me pasardhësit e tyre.
Unë i ftoj të tërhiqen! Kjo nuk është beteja ime! Jo vetëm e imja! As si gazetare, as si qytetare!
Kjo është një betejë për fjalën e lirë dhe raportimin e pavarur!”, shkruan ajo.
