Prokuroria e Tiranës ka dyshimet të forta se vrasja e Kudret Saliajt nga vjehrri i tij, Nexhip Picari, ka qenë një ngjarje e paramenduar dhe e kryer në bashkëpunim me bashkëshorten e viktimës, Dhurata Saliaj.
Veprimet e para hetimore për ngjarjen kanë zbuluar se babe e bijë kanë mbajtur në vëzhgim lëvizjet e 41 vjeçarit Saliaj para krimit. Dy palët kundështare në procesin e divorcit kanë qenë të ulur në verandën e të njëjtit bar. Burime pranë prokurorisë, pohuan se nga kqyrja e kamerave të sigurisë rezulton se Dhurata Saliaj ka vëzhguar nga distanca tavolinën ku ndodhej avokati Adriatik Cama dhe një psikologe.
Në momentin kësaj tryeze i është bashkuar Kudret Saliaj, babai i saj është afruar drejt tyre dhe ka hapur zjarr,duke qëlluar 4 herë dhëndrin e tij 41 vjeçar dhe një herë avokatin Cama. Dyshimet e prokurorisë për bashkëpunim janë forcuar edhe për shkak të kundështive të mëdha mes deklarimeve të Nexhip Picarit dhe Dhurata Saliajt, një prej të cilëve pretendon të ketë qenë i vetëm në lokal.
Nga ana tjetër, grupi i hetimit nuk e ka të qartë nëse avokati Adriatik Cama, ish-prokuror i disa dosjeve të bujshme është plagosur rastësisht, apo ka qenë objektiv, fakt që mund të rëndojë së tepërmi akuzën për babë e bijë. Të dielën prokuroria e Tiranë depozitoi në gjykatë kërkesën për caktimin e masës së sigurisë “arrest në burg” për Nexhip Picarin e Dhurata Saliajn, kërkesë që pritet të shqyrtohet gjatë së hënës.