Kreu i SPAK, Arben Kraja vazhdon raportimin në Komisionin e Ligjeve lidhur me punën vjetore të institucionit që ai drejton. Gjatë fjalës së tij, Kraja tregoi për vështirësitë dhe problematikat që po has institucioni që drejton.
“Kemi qenë në disa situata problematike dhe jo normale të ushtrimit të aktivitetit, numri i prokurorëve është i pakët, mungesa e strukturës së BKH, ambientet tona kanë qenë në rikonstruksion dhe jemi zhvendosur në kushte jonormale dhe pandemia. Kemi 588 procedime penale, 216 hetime kanë përfunduar, 216 persona janë marrë të pandehur”, tha ai
Gjithashtu kreu i SPAK ka zbardhur faktin, se deri më tani mbi 1000 persona janë përgjuar dhe pjesa më e madhe e tyre ka qenë për çështje korrupsioni.
“Përgjimet, në dhjetor të 2019 është vendosur një ambient i veçantë për kryerjen e përgjimeve, janë të izoluara, të sigurta ku janë 7 poste, ku oficerët kanë kryer punën. 91% e procedimeve penale është kryer metoda e përgjimeve nga 10 oficerë, ngarkesa ka qenë e madhe. Mbi 1000 subjekte të përgjuara, pjesa më e madhe për korrupsion. 41 kërkesa për ndihmë nga autoritet e huaja, në total janë ekzekutuar 22 prej tyre. 24 raste për ekstradim. Një punë tjetër që na ka kushtuar shumë punë është ajo kundër terrorizmit. Ka pasur 62 kërkesa për konfiskim pasuri, 25 është pranuar kërkesa për sekuestrimin e pasuritë”, tha Kraja.
Referuar shifrave të deklaruara nga Kraja, veçanërisht lidhur me përgjimet të bën përshtypje fakti se deri më tani kanë arritur të shpëtojnë ato që konsiderohen si “peshqit” e mëdhenj. Pavarësisht se në SPAK janë depozituar me dhjetra kallëzime penale për ish-ministra e ministra, për kryebashkiakë apo edhe për vetë Kryeministrin Edi Rama dhe Erion Veliajn, lidhur me shembjen e Teatrit Kombëtar, ende nga Prokuroria Speciale nuk ka një konkluzion.
