Varianti i koronavirusit, i identifikuar fillimisht në Indi, tani është dominant në Mbretërinë e Bashkuar, ka thënë Zyra e Shëndetit Publik në Angli. Numri i rasteve të konfirmuara nga analizat laboratorike është rritur për 79 për qind javën e kaluar, duke arritur në 12,431.
Shkencëtarët besojnë se ky variant, që tashmë njihet si Delta, ka tejkaluar variantin që është identifikuar fillimisht në Britani dhe tani njihet si Alfa. Ata thonë se mund të ketë rrezik të rritjes së numrit të personave të shtrirë në spital për shkak të variantit Delta.
Mirëpo një gjë e tillë bazohet në të dhënat e hershme dhe Zyra e Shëndetit Publik ka thënë se duhet bërë më shumë hulumtime për të vërtetuar gjetjet e reja.
“Me dominim të këtij varianti në Mbretërinë e Bashkuar, është shumë e rëndësishme që të vazhdojmë të kemi kujdes sa më shumë që është e mundur”, ka thënë mjekja Jenny Harries, njëherësh shefe ekzekutive e Agjencisë për Siguri Shëndetësore.
“Mënyra për të luftuar variantet është që të luftojmë përhapjen e gjithë koronavirusit”.
Zyra e Shëndetit Publik në Angli ka thënë se pjesa më e prekur nga ky variant vazhdon të jetë veriperëndimi i Anglisë.
DENONCO