Rama tregon planet për sipërmarrjet e reja turke në Shqipëri: Po çojmë para agjendën

Kryeministri Edi Rama ka publikuar planet e zhvillimit të sipërrmarrjes në bashkëpunimin me atë turke.

Në ditën e dytë të vizitës në Ankara, Rama njoftoi projektet që do të nisin me bashkëpunimin sipas të të ekselencës turke.

E para në listë është ndërtimi i një fabrike të 7 llojeve të vaksinave, Teknopark Albania, sistemi i kontrollit të territorit të vendit me dronë superinteligjentë, si edhe programin e mandatit të tretë për infrastrukturën kombëtare.

Duket se Rama është optimist lidhur me raportet e bashkëpunimit me Turqinë, në një kohë kur nuk dihet nëse Shqipërisë do t’i hapen ose jo negociatat me BE.

“Ankara – Ditë bashkëbisedimesh të detajuara me sipërmarrje të ekselencës turke për:

Ndërtimin e fabrikës së 7 llojeve të vaksinave, si zemra e një qendre të klasit të parë të prodhimit farmaceutik

Teknopark Albania, një qendër e teknologjisë së lartë në periferi të kryeqytetit, për kompanitë HighTech, Start Up-et e kërkimin shkencor, sipas modelit të suksesshëm të jetësuar në Turqi, si katalizator i transformimit ekonomik e social dhe krijimit të vendeve cilësore të punës për të rinjtë

Sistemin e kontrollit të territorit të vendit me dronë superinteligjentë, për prodhimin e të dhënave në kohë reale mbi rrugët, bregdetin, tokën bujqësore, pyjet, rendin publik, natyrisht e të tjera akoma.

Programin e Mandatit të Tretë për infrastrukturën kombëtare”, shkruan Rama.

Në një tjetër postim në rrjetet sociale, Rama shkruan se takimet e sotme bilaterale çuan më tej axhendën e bashkëpunimit për:

• Shëndetësinë (me fokus reformën e Autonomisë Spitalore, binjakëzimin e Agjencive të Barnave dhe perspektivën e Spitalit Rajonal Memorial të Fierit në spital universitar)

• Arsimin, (me fokus çeljen në Shqipëri të filialit të Universitetit Teknik të Stambollit dhe planin për fakultetin e ardhshëm të mjekësisë e infermierisë pranë Spitalit Rajonal Memorial)

• Strehimin Social (me fokus reformimin e thellë të politikës sonë të strehimit)

• Kulturën e Turizmin (me fokus programin e restaurimeve të mëtejshme në Berat e Gjirokastër dhe investimet në hotelerinë me 5 yje në bregdet).