Ish-Drejtori i CIA-s, njëherësh ish-Sekretari i Shtetit i SHBA, Mike Pompeo, tha se eksperimente dhe hulumtime sekrete ushtarake po kryhen në Institutin e Virologjisë në qytetin kinez të Wuhan dhe se ka shumë prova që virusi i Corona-s doli nga laboratori.
Pompeo foli disa ditë pasi Joe Biden, presidenti aktual i Shteteve të Bashkuara, urdhëroi inteligjencën për të përcaktuar origjinën e COVID-19 në 90 ditët e ardhshme.
“Mund të them me siguri se ne e dimë që njerëzit nga ai laborator ishin të përfshirë në bashkëpunim me Ushtrinë Çlirimtare të Popullit. Pra, aktivitetet ushtarake u zhvilluan atje në të njëjtën kohë, edhe pse ata pretenduan se ishte një hetim rreptësisht civil”, i tha Pompeo Fox News.
Ai shtoi se Kina nuk pranoi të thoshte se për çfarë po punonin, si dhe se ajo refuzoi hyrjen në Organizatën Botërore të Shëndetësisë (OBSH), duke arritur në përfundimin se vetë operacioni i fshehjes tregon se shumë gjëra që nuk diheshin po ndodhnin atje.
“Ata duhet të thonë se çfarë ndodhi”
“Ai laborator i testimit të virusit është akoma atje dhe po punon. Ai ndoshta po kryen teste që çuan në rrjedhjen e virusit nga laboratori. Vetëm Partia Komuniste Kineze e di përgjigjen, por e gjithë bota meriton një përgjigje dhe ata duhet të na tregojnë se çfarë ndodhi”, tha Pompeo.
Ai shprehu kënaqësinë me urdhrin e Biden për të hetuar origjinën e virusit.
“Shpresoj që hetimi të bëhet seriozisht. Komuniteti i inteligjencës e ka monitoruar këtë situatë për më shumë se 90 ditë“, tha ish-drejtori i CIA-s.
Që nga fillimi i pandemisë vitin e kaluar, Pompeo ka mbështetur teorinë se virusi ka rrjedhur nga një laborator në Wuhan.
“Që nga pranvera e vitit 2020, ka pasur prova që virusi ka origjinën nga një laborator. Ne e dimë që kishte njerëz që u sëmurën atje, shkencëtarë që u sëmurën atje”, tha Pompeo, duke shtuar se viruset në laboratorë u modifikuan për të qenë më ngjitës dhe potencialisht vdekjeprurës, dhe se administrata aktuale duhet ta hetojë atë.
