Video Assistant Referee (VAR) do aplikohet në Shqipëri nga sezoni që vjen. Si një ndihmë për arbitrat, pritet që në Superligë të ulen gabimet e gjyqtarëve duke e bërë garën më të besueshme. FSHF, me ndihmë nga UEFA ka investuar afro 2 milion euro për sistemin që ju vjen në ndihmë arbitrave, teksa prej muajsh gjyqtarët janë trajnuar për këtë sistem të ri.
Pritet që në Shqipëri VAR të aplikohet në miqësoret që skuadrat tona do bëjnë në verë, duke qenë gati për sezonin e ri në elitë. FSHF ka vendosur në dispozicion furgonët lëvizës me të gjitha aparaturat, teksa një bashkëpunim do ketë edhe me kompaninë që transmeton ndeshjet. Më shumë kamera dhe më shumë plane për rastet e dyshimta, teksa ende stadiumet tona nuk I kanë kushtet.
Në dilemë është montimi i pajisjeve në disa stadium, që nuk i kanë kushtet e duhura për këtë teknologji. Stadiumi i Laçit dhe ai i Kastriotit nuk i plotësojnë kushtet, teksa ai i Egnatias është në ndërtim. Investimi madhor i FSHF-së në teknologji rrezikon mos zhvillohet i plotë, me kushtet e stadiumeve tona. Kujtojmë se pesë ndeshjet e Superligës nga sezoni i ri do jenë nën regjimin VAR.
