I shpëtoi prangave dhe hetimeve, Paulin Gega i firmës “Gega OIL” fiton gjysmë milioni euro tender nga SHISH

Nga BoldNews.al

Në verën e vitit 2019, policia shpalli në kërkim Paulin Gegën, pronarin e markës së karburanteve “Gega OIL”. Akuza të rënda; evazion fiskal”, “fshehja e të ardhurave”, “pastrim parash”, etj. Por, pas 2 vitesh, Paulini jo vetëm që nuk po përballet me drejtësinë, por po vijon që të fitojë tendera në institucione publike.

Madje, edhe në institucionet e shërbimeve të inteligjencës, ato që duhet që të investigonin për veprimtari të paligjshme, duke qenë një nga sektorët kyç që lidhet edhe me sigurinë kombëtare. Sipas dokumenteve që disponon BoldNews, kjo firmë ka fituar një tender të majmë plot gjysmë miliardi lekë nga SHISH.

Në dokumentet e tenderit, thuhet se “GEGA OIL GROUP SHA” dhe “GEGA CENTER GKG” kanë fituar një tender me vlerë rreth gjysmë miliardi lekë. Tenderi është zhvilluar nga Shërbimi Informativ Shtetëror, i cili ka hapur dy lote në këtë tender.

Për lotin 1 është hapur tenderi “furnizim me lëndë djegëse për automjete diezel”, me fond limit 31.896.388 lekë. Dhe, për lotin II “furnizim me lëndë djegëse për automjete benzinë pa plumb” me fond limit 15.220.665 lekë.

“GEGA” ka dhënë një ofertë me marzh fitimi i shprehur në përqindje 10% për lotin e I-re dhe 10% për lotin e II-të.

Ndërkohë, në tender ka marrë pjesë edhe “Kastrati” që ka ofruar një marzh fitimi 12.4 % për Lotin I dhe 13.4 % për Lotin II. Tenderi është fituar nga “GEGA”, pasi në dokumentet shoqëruese nuk ka pasur ndonjë klauzolë s’kualifikimi për ndonjë hetim të mundshëm apo ndonjë procedim penal të hapur.

Në fund të muajit maj 2021, Shërbimi Informativ shpalli edhe fituesin, ndërsa ajo që bie në sy është se në dokumentet nuk kishte asnjë indicie apo kusht se “nëse kishte hetim të hapur” do të s’kualifikohesh.

Tenderi ka nxjerrë zbuluar edhe institucionet tatimore, doganore, madje edhe drejtësinë. Pasi, në këtë vend çudia më e madhe “3 ditë zgjat”. Dhe, pas 3 ditëve, vijon të xhirosh dhe fitosh miliarda lekë nga paratë’ publike. Në 2019, sipas njoftimeve të institucioneve shtetërore, administratori i ‘Gega Oil’ , Paulin Gega u shpall në kërkim pasi akuzohej për pastrim parash dhe evazion fiskal në shuma të konsiderueshme.

Pas kontrollit të bërë, në kuadër të aksionit kundër informalitetit, rezultoi se janë gjetur pompa në shkelje të ligjit, për këtë arsye është bllokuar tregtimi i karburantit nga kompania “Gen Klaudis Sha”. Në atë kohë, prokuroria nxori urdhër ndalimi, ndërsa hetime për “GEGA OIL” ka pasur edhe nga Prokuroria e Shkodrës.