Vlora është tronditur sërish nga një ngjarje e rëndë kriminale.
Pak pas mesnatës, u regjistrua një atentat ndaj 35-vjecarit Shkëlzen Velaj, në momentin kur ai ishte duke u futur në banesën e tij.
Dinamika
Sipas burimeve policore dyshohet se Velaj ndërsa futej në banesë, ka vënë re se pranë pallatit ka qenë duke u ndjekur nga një makinë e dyshimtë. Menjëherë ai ka lënë makinën e tij ndezur duke vrapuar për të hyrë në banesë, në katin e 5 të pallatit. Por teksa ka qenë duke hapur derën e banesës, atentatori ka lëshuar breshëri plumbash në drejtim të tij. Shkëlzen Velaj është qëlluar nga një distancë e afërt. Atentatori ka zbrazur mbi trupin e tij një karikator automatiku, ndërkohë sipas policisë, Velaj ka humbur jetën në spital.
Pas atentatit, 35-vjeçari Shkëlzen Velaj është gjetur në shkallët e pallatit nga familjarët e më pas është transportuar në spitalin Rajonal ku dhe ka humbur jetën.
Makina e djegur
Atentati dyshohet të jetë kryer nga 2 apo më shumë persona. Autorët, pas atentatit, janë larguar në drejtim të rrugës së lumit të Vlorës, dhe në afërsi të fshatit Babicë kanë braktisur makinën tip “BMË” pa targa dhe e kanë djegur. Në makinën e djegur – që dyshohet se është përdorur në vrasje – është gjetur edhe një armë automatike tip kallashnikov.
Janë shoqëruar 4 persona për tu marrë në pyetje.
Në Vlorë kanë mbërritur forcat Renea, në mbështetje të policisë lokale, që ka shkuar në vendin e ngjarjes pas marrjes së njoftimit dhe po punon për zbardhjen e saj.
Historiku i vrasjeve në Vlorë
35-vjecari Shkëlzen Velaj, i cili u ekzekutua në hyrje të banesës së tij është vëllai i Ardi Velajt, një prej viktimave të ngjarjes së ndodhur në 7 prill të vitit 2015, kur pas një sherri në kazino mbetën të vrarë Albi Limaj, Haki Rakipi dhe Ardi Velaj.
Policia arrestoi atëherë si autorë të masakrës Aleksandër Llanaj, Ani Begaj dhe Bertil Aliaj. Gjatë seancave të gjata, u dënua me burgim të përjetshëm Aleksandër Llanaj, ndërsa Ani Begaj dhe Bertil Aliaj u dënuan me nga 35 vjet burg në mungesë. Ashtu siç pritej, ato vrasje ndezën një seri atentatesh për hakmarrje mes fiseve të personave të vrarë dhe autorëve.
Policia dyshon se një nga fiset e përfshira në ngjarje ka marrë hak ndaj Erven Hysenit, ish-pronar i një televizioni lokal në Vlorë. Ai u qëllua për vdekje më 24 maj të vitit 2017.
Plumbat kanë vrarë edhe Roland Saliun, drejtuesi lokal i OSHEE-së. Pas 5 muajsh, hakmarrja do të vijonte në rrugën “Transballkanike”.
Më 1 tetor të vitit 2017 janë plagosur Ferdinand Llanaj, së bashku me Dritan Begaj, ndërsa u plagos edhe një i mitur. Policia, në këtë rast gjeti vetëm automjetin e djegur të autorëve.
Më 14 janar të vitit 2019 ndodhi plagosja e Mikel Mehmetaj. Ai njihej për lidhje me fisin Llanaj. Sërish policia gjeti vetëm një automjet të djegur.
Atentati i fundit në Vlorë, sërish sipas burimeve nga policia, dyshohet se ka lidhje me serinë e vrasjeve.
Në Shkurt 2019, Arjan Hasani dhe Orest Rexho u vranë, ndërsa miku i tyre, Armando Sulejmani, i njohur me emrin “Çipuri” u plagos rëndë. Ky i fundit u ndalua ndërsa ishte në kërkim nga policia, pasi dyshohet si një prej organizatorëve dhe pjesëmarrësve të sulmit të armatosur në tetor të vitit 2017, ku mbetën të plagosur Ferdinand Llanaj, djali i tij i mitur, dhe i afërmi i tij Dritan Begaj.
Por “Çipurin”, që s’e gjeti dot policia, e gjetën kundërshtarët e tij.
Të gjitha këto krimie, sipas policisë, kanë lidhje me ngjarjen e nodhur në vitin 2015, e quajtur dhe masakra e “Çoles”.
Lexo edhe:
“Hape derën”/ Fqinjët rrëfejnë momentet e fundit të Shkëlzen Velajt para ekzekutimit (VIDEO)
