Dëshirë e vjetër e drejtuesve, Partizani sytë nga ish-lojtari i Skënderbeut

Partizani do lërë Shqipërinë për të zhvilluar fazën përgatitore në Ohër. Pjesëmarrja në Europë nuk lë kohë për pushime, me Demat që do udhëtojnë në datën 7 qershor për në Maqedoninë e Veriut. Për afro 10 ditë skuadra do marrë ngarkesën e duhur fizike, aty ku do shihen edhe lojtarët që trajneri Ilir Daja do ketë në dispozicion.

Pjesëmarrja në Conference League ka bërë që Partizani të impenjohet më herët në përgatitje, duke mësuar emrin e kundërshtarit në 15 qershor. Në 8 dhe 15 korrik janë programuar sfidat e turit të parë të Conference League, me Partizanin që do luajë si vendase në “Elbasan Arena”.

Te Partizani sytë janë edhe në merkato, teksa klubi ka disa emra për fashën e majtë të mbrojtjes. Ashtu siç raporton Panoramasport, në dritë ka dalë edhe Gledi Mici, lojtari i Prishtinës që ka një të kaluar të gjatë në Superligë. Veç ish-it të Skënderbeut, janë edhe Imami e Ndreca dy nga emrat e përfolur.