Preferohet nga drejtori i Partizanit, mbrojtësi thyen heshtjen: Jam i hapur për bisedime

Një alternativë për krahun e majtë të mbrojtjes të Partizanit është Edison Ndreca. 26-vjeçari ishte ndër lojtarët më të mirë te Bylisi edicionin e shkuar, duke luajtur 32 ndeshje dhe duke shënuar 6 gola. Ndreca ka edhe një gjuajtje tepër të fortë, si dhe është tepër luftarak në aspektin mbrojtës.

I pyetur për të ardhmen e tij dhe për interesimin nga Partizani, Ndreca u shpreh: “Unë jam lojtar i lirë, si dhe nuk kam klauzola. Do të jem në bisedime me çdo ekip që shfaq interes për mua. Kaq mund të them për momentin”, tha Ndreca për “Panorama Sport”.

Kualitetet e Ndrecës kanë tërhequr vëmendjen edhe të Olsi Ramës. Drejtori i përgjithshëm i të kuqve, gjatë një ndeshjeje mes Partizanit dhe Bylisit, është dëgjuar duke pyetur për numrin 16, të cilin e konsideroi një lojtar tepër të mirë. Futbollisti me numër 16 është pikërisht Ndreca. Duke parë dhe “thatësirën” në futbollin shqiptar, sa u takon mbrojtësve të majtë, Ndreca shihet si përforcimi i duhur nga Partizani.