Spitali “Shefqet Ndroqi” do t’i rikthehet sërish funksionit si Sanatorium. Prej më shumë se 1 viti spitali “Shefqet Ndroqi” funksiononte si spital Covid2, ku trajtoheshin pacientët e prekur nga koronavirusi.
Kryesisht në këtë spital janë trajtuar pacientët që vinin nga qytete të ndryshme të vendit. Ndërkohë në këtë spital u regjistruan edhe rastet e vetëvrasjeve të pacientëve, ku së paku 4 prej tyre morën vendimin fatal për tu hedhur nga lartësia.
Megjithëse Prokuroria nisi hetimet kurrë nuk u bënë publike përfundimet apo të zbardheshin shkaqet. Po kështu në këtë spital u shfaq edhe Tirja, sanitarja që rrëzoi propogandën qeveritare lidhur me kushtet në spitale. Tirja, u denoncua nga një qytetare, e cila humbi të ëmën e saj pikërisht te spitali Shefqet Ndroqi ku trajtohej për koronavirusin.
Nga mesazhet e publikuara u zbulua një skemë, ku pacientes nuk i jepej asnjë shërbim, lihej edhe pa ngrënë dhe pa ujë, ndërsa familjarëve të saj, u merreshin shuma të mëdha parash.
Tirja u arrestua pas një presioni të opinionit publik lidhur me rastin e denoncuar, ndërsa përgjegjësia mbeti aty, vetëm te sanitarja.
