Këshilli i Lartë Gjyqësor ka shkarkuar nga detyra magjistratin Klinton Spahiu, pas kërkesës nga Inspektorati i Lartë i Drejtësisë.
Magjistrati Klinton Spahiu është akuzuar dhe dënuar për korruspion, pasi sipas gjykatës së Posaçme të Apelit, me vendimet e marra prej tij ka favorizuar njërën palë që po gjykohej, duke marrë si shpërblim përfitime personale. Sipas akuzës, një biznesmen kishte sponsorizuar udhëtime jashtë vendit për Spahiun dhe dy gjyqtarë të tjerë, teksa ishte palë në një proces civil që po shqyrtohej nga ata. Organi i akuzës radhiti si prova udhëtimet në të njëjtën kohë të tre gjyqtarëve me biznesmenin në Itali dhe Spanjë. Sipas hetimeve, gjyqtarët kanë udhëtuar për të ndjekur ndeshjen mes Real Madridit dhe Barcelonës në tetor 2014.
Klinton Spahiu ka paraqitur dhe kërkesën për dorëheqje në KLGJ.
KLGJ njoftoi se “në raport me faktet e provuara në këtë proces hetimi disiplinor si dhe të pranuara nga gjykata rezulton se nga ana e magjistratit K.S. janë ndërmarrë veprime aktive me anë të përfitimit në mënyrë të drejtpërdrejtë, veprime të cilat janë vlerësuar se përmbajnë elementë të veprës penale të parashikuar nga neni 319/ç i K.Penal, të kryera gjatë ushtrimit të detyrës, me dashje direkte dhe me qëllim përfitim të parregullt prej tyre, duke favorizuar njërën palë ndërgjyqëse nëpërmjet dhënies së vendimi gjyqësor civil në favor të tij”.
Sipas KLGJ, veprimet e magjistratit K.S. kanë cenuar veprimtarinë e rregullt të organeve të drejtësisë nga veprimet e parregullta të personave të jashtëm por edhe nga veprimet e vetë atyre si funksionarë të drejtësisë.
“Këto veprime kanë cenuar besimin e palëve ndërgjyqëse dhe të publikut në organet e drejtësisë dhe respektimin e ligjit nga ana tyre, si dhe kanë diskretituar rëndë pozitën dhe figurën e magjistratit. Ushtrimi i pa rregullt i detyrës nga ana e magjistratit K.S.ka sjellë pasoja për dhënien e drejtësisë, ka diskretituar rëndë pozitën dhe figurën e gjyqtarit, si dhe ka cenuar besimin e publikut te drejtësia. Kur shkelja disiplinore identifikohet me kryerjen e një krimi, për të cilinmagjistrati është dënuar me vendim gjyqësor të formës së prerë, passjell shkarkimin nga detyra të magjistratit, si një masë me natyrë përjashtuese nga sistemi gjyqësor, mekarakter të përhershëm, e cila nuk shuhet. Për pasojë, Inspektori i Lartë i Drejtësisë kërkon nga KLGJ administrimin e provave të paraqitura prej tij në këtë procedim disiplinor, pranimin e kërkesës së ILD për fillimin e procedimit disiplinor dhe caktimin ndaj magjistratit K.S. të masës disiplinore ‘shkarkim nga detyra’”, thuhet më tej në njoftimin e KLGJ.
