Ish-lojtari i Skënderbeut del hapur: Jam në bisedime me Partizanin dhe Dinamon

Bajram Jashanica pranon se është në bisedime me klubet e kryeqytetit Partizani dhe Dinamo. Një ditë pasi “Panorama Sport” publikoi lajmin se të kuqtë dhe blutë kërkojnë qendërmbrojtësin kosovar, ka qenë vetë ky i fundit që ka konfirmuar gjithçka.

“Po, është e vërtetë. Jam në bisedime me Partizanin dhe Dinamon. Megjithatë, për momentin nuk kam asgjë konkrete për të ardhmen”, ka thënë shkurtimisht Jashanica për gazetën. Në sezonin e fundit mbrojtësi ishte pjesë e Ballkanit të Suharekës, por tashmë së pari ai duhet të mbyllë llogaritë me këtë klub, që shpenzoi jo pak për t’i blerë kartonin te Skënderbeu. Me sa duket, çdo gjë do të varet nga zgjidhja e marrëveshjes me Ballkanin. Kujtojmë që trajneri i Partizanit, Ilir Daja, e kërkoi Jashanicën, që në verën e vitit të kaluar, por merkatoja e bllokuar e të kuqve, bëri që mbrojtësi të zgjidhte Ballkanin. Tashmë trajner i Dinamos është Bledi Shkëmbi, i cili e ka pasur nën urdhra Jashanicën te Ballkani.