Gjykata e Posaçme e Apelit ka lënë në burg dy personat që u arrestuan para zgjedhjeve në Dibër, me një shumë parash në makinë, që dyshohet se do të përdoreshin për blerjen e votave.
Dy personat e arrestuar janë juristi i bashkisë Denis Xholi si dhe Albjon Ceku, aktivist i Partisë Socialiste pjesë e shtabit elektoral të kësaj force politike. Këta persona u ndaluan në hyrje të Maqellarës ku në makinën e tyre u gjet një shumë prej rreth 7 milionë lekësh të vjetra që dyshohet se do i përdornin për të blerë vota.
Çështja ndaj tyre është hetuar nga SPAK, pasi është pjesë e krimeve zgjedhore, që është kompetencë e kësaj prokurorie.
Dy të pandehurit kishin kërkuar një masë më të butë në apel, por kërkesa e tyre nuk është pranuar.
Ata kanë mohuar akuzat se do blinin vota.
