Ankimet e LSI dhe PD, Kolegji Zgjedhor do shqyrtojë sot padinë për Vlorën

Ditën e sotme, Kolegji Zgjedhor do të shqyrtojë një tjetër padi të bërë nga partitë politike lidhur me vendimin e KAS për Vlorën. Kjo padi vjen pasi KAS ka rrëzuar kërkesat e Partisë Demokratike dhe Lëvizjes Socialiste për Integrim për pavlefshëmri dhe përsëritje të zgjedhjeve edhe në këtë qark. KAS vendosi të rrëzojë edhe kërkesën e PD për prova shtesë nga institucionet e tjera publike, ndërsa pranoi kërkesën e LSI për të marrë informacion në sa qendra votimi nuk ka funksionuar pajisja PEI në këtë qark.

Megjithatë në fund të shqyrtimit vendosi rrëzim të kërkesës. Padia në Kolegj Zgjedhor për Gjirokastrën e rrëzuar dje, ishte bërë nga PD, LSI dhe Vetëvendosje. Thuajse të gjitha vendimmarrjet e Komisionit të Ankesave dhe Sanksioneve në KQZ janë dërguar nga PD, LSI dhe Vetvemdosje në Kolegjin Zgjedhor. Me përfundimin e Gjirokastrës në Kolegjin Zgjedhor mbetet për tu gjykuar edhe 8 qarqe dhe një prej tyre është Vlora.

Ndërkaq theksojmë se KAS dje ka përfunduar të gjitha ankimet për 25 prillin pasi dje rrëzoi kërkesat ankimore të PD dhe LSI për Korçën, Elbasanin dhe Fierin, të cilat ishin qarqet e fundit.  Tashmë radha e shqyrtimet të ankesave e ka Kolegji Zgjedhor.